तनहुँमा ९९ वर्षीय जेक्ष्ठ नागरिक वृषसिंह गुरुङले स्टेचरमा आएर पुनः मतदान गरेका छन् । उनले यसअघि ३० वैशाखमा पनि मतदान गरेका थिए । 

व्यास नगरपालिकाको नगर प्रमुखका स्वतन्त्र उम्मेदवार दीपकराज जोशीमाथि कुटपिट भएपछि रोकिएको मतदान केन्द्रमा बुधबार पुनः मतदान भइरहेको हो । 

व्यास नगरपालिका–८ को २ वटा मतदान केन्द्रमा आज पुनः मतदान भइहरहेको छ । निर्वाचन आयोगको शनिबार भएको निर्णयानुसार शुक्रबार भएको मतदानलाई रद्द गरी पुनः मतदान गर्नु भनी निर्देशन भई आएकाले बुधबार पुनः मतदान भएको हो । 

वडा नम्बर ८ को रिस्तीस्थित पुरानो गाविस भवन फेदी ‘क’ र ‘ख’ केन्द्रमा पुनः  मतदान भइरहेको छ । मुख्य निर्वाचन अधिकृत हरिश्चन्द्र ढुङ्गानाका अनुसार बिहान ७ बजेदेखि अपरान्ह ५ बजेसम्म पुनः मतदान हुँदैछ ।