कैलालीको धनगढी उपमहानगरपालिका प्रमुखमा स्वतन्त्र उम्मेदवार गोपाल हमाल निर्वाचित भएका छन् । उनी गठबन्धनका उम्मेदवार रहेका नेपाली कांग्रेसका नृपबहादुर वडलाई हराउँदै मेयरमा निर्वाचित भएका हुन् ।  

हमाल २६ हजार ८६५ मतका साथ मेयरमा विजयी भए । अघिल्लो निर्वाचनमा उनी वडसँग २ हजार ७९७ मतले पराजित भएका थिए । ०७४ को निर्वाचनमा हमालले ११ हजार ५२७ मत प्राप्त गरेका थिए । 

त्यस्तै, यसपालि हमालका निकटतम प्रतिद्वन्द्वी वडले १४ हजार ८१७ मत मात्र पाए । उनी अघिल्लोपटक १४ हजार ३२४ मतका साथ विजयी भएका थिए ।

त्यस्तै, मेयरका अर्का उम्मेदवार नेकपा एमालेका रणबहादुर चन्दले ९ हजार ११५ मत प्राप्त गरेका छन् । यसपालि उपमहानगरपालिकाको उपप्रमुखमा नेकपा एमालेकी उम्मेदवार कन्दकला राना निर्वाचित भएकी छन् ।

उनी १५ हजार ४७९ मतसहित उपमेयरमा निर्वाचित भएकी हुन् । रानाकी निकटतम प्रतिद्वन्द्वी गठबन्धनको तर्फबाट उम्मेदवार बनेकी माओवादी केन्द्रकी शान्ति अधिकारीले १२ हजार ६७० मत प्राप्त गरिन् ।  

अधिकारी अघिल्लो निर्वाचनमा पनि उपमेयरमा पराजित भएकी थिइन् । त्यसबेला पनि उनी माओवादीबाटै चुनाव लडेकी थिइन् ।

त्यस्तै, यसपटक स्वतन्त्र उपमेयर उम्मेदवार प्रभाकर भण्डारीले ६ हजार ६०९ मत ल्याए । धनगढीको मतगणना आज बिहान सकिएको हो । आधिकारिक घोषणा भने केही समयपछि हुनेछ ।