बझाङ जिल्लाको दुर्गाथली गाउँपालिकाका नवनिर्वाचित गाउँपालिका अध्यक्ष दिलबहादुर थापाले गाउँपालिकाभरि सामाजिक सुरक्षा भत्ता प्राप्त गर्ने व्यक्तिको घरमा नै गएर सामाजिक सुरक्षा भत्ता वितरण गर्ने बताएका छन् । सामाजिक सुरक्षा भत्ता बैकमार्फत भुक्तानी गर्दा स्थानीयलाई समस्या हुने गरेका कारण अवदेखि घरघरमा नै गएर सामाजिक सुरक्षा भत्ता वितरण गर्ने उनले बताएका हुन् ।
स्थानीय तहको निर्वाचन ०७९ मा थापा नेकपा माओवादी केन्द्रबाट दुर्गाथली गाउँपालिकाको अध्यक्षमा निर्वाचित भएका हुन् । अधिकांश वृद्धवृद्धाले आफूलाई घरमा नै आएर भत्ता वितरण गर्न आग्रह गर्दै आएकाले अबदेखी नागरिकको घरमा नै गएर सामाजिक सुरक्षा भत्ता वितरण गर्ने उनले बताएका हुन् ।
तर, सामाजिक सुरक्षा नियमावलीको पहिलो संशोधनको २०७७ को दफा १७ को उपदफा ३ मा भने सामाजिक सुरक्षा भत्ता अनिवार्य रुपमा बैकमार्फत वितरण गर्नुपर्ने व्यवस्था गरिएको छ । कुनै पनि स्थानीय तहले सामाजिक सुरक्षाबापतको रकम बैंकमार्फत नै भुक्तानी गर्नुपर्ने र बैंकमार्फत भुक्तानी नभएको रकमलाई गैरकानुनी रुपमा लिइने सामाजिक सुरक्षा नियमावलीको पहिलो संशोधनको २०७७ मा ले व्यवस्था गरिएको छ ।
गाउँपालिका अध्यक्षले नै सामाजिक सुरक्षा भत्ता हात–हातमा दिने अभिव्यक्ति दिएका छन् । यसरी दिएको रकमलाई महालेखा परीक्षकले बेरुजुमा देखाउने भए पनि पालिका अध्यक्षले नै गैरजिम्मेवार अभिव्यक्ति दिएको भन्दै अहिले थापाको आलोचना भइरहेको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।