हप्तैपिच्छे पेट्रोलियम पर्दाथमा मूल्यवृद्धि भएको भन्दै बागमती प्रदेशको राजधानी हेटौंडामा विरोध प्रदर्शन गरिएको छ ।

मंगलबार साँझ हेटौंडाको बुद्धचोकमा अनेरास्ववियु, राष्ट्रिय युवा संघ, नेपाल खेलकुद महासंघ , मुस्लिम ईत्तेहाद संघ लगाएत जनवर्गीय संगठनहरुले सडकको बीच भागमा मूल्यवृद्धि विरुद्ध फरक शैलीमा विरोध प्रदर्शन गरेका हुन् ।

उनीहरुले पेट्रोलियम पर्दाथमा भएको मूल्यवृद्धिले सवारीसाधन चलाउन नसकिएकोतर्फ संकेत गर्दै हेटौंडाको सीमाचोकबाट मोटरसाइकल डोर्याएर मूल्यवृद्धिविरुद्ध प्रदर्शन गरे । यसैगरी, उनीहरुले सामान्य नागरिकले खाना पकाउने ग्याँस खरिद गर्न नसक्ने गरी मूल्यवृद्धि भएको संकेत गर्दै सडकमै दाउरा बालेर चिया पकाएरसमेत प्रदर्शन गरे ।

विरोध प्रदर्शनमा मूल्यवृद्धि फिर्ता गर, सडक हामी तताउँछौ मूल्यवृद्धि घटाउँंछौँ, परमादेशी सरकार राजीनामा देलगायतको प्ले कार्ड बोकेर उनीहरुले विरोध जनाएका थिए । सरकारले गरेको मूल्यवृद्धि विरुद्ध देशभर प्रदर्शन भइरहेको छ ।