मंगलबार रोल्पामा अटो दुर्घटना हुँदा चालकको मृत्यु भएको छ। दुर्घटनामा तीनजना घाइते भएका छन् । 

सदरमुकाम लिवाङबाट यात्रु लिएर माडीचौरतिर जाँदै गरेको अटो सिमलबाङस्थित सडकबाट तल खसेर दुर्घटनामा परेको हो।

मृत्यु हुनेमा रा१ह ४३४७ नम्बरको अटोका चालक रोल्पा नगरपालिका–२ थलिबाङ गाउँ निवासी अन्दाजी २९ वर्षका महेश कुँवर छन् । उनको घटनास्थलमै मृत्यु भएको प्रहरीले जनाएको छ। 

प्रहरीका अनुसार उक्त अटो सडकबाट करिब ५० मिटर मुनि खसेको थियो। अटो अनियन्त्रित भएकाले दुर्घटनामा परेको हुनसक्ने प्रहरीको अनुमान छ । 

दुर्घटनामा घाइते हुनेमा अटोमा यात्रा गरिरहेका रोल्पा नगरपालिका ७ माडिचौरका ५३ वर्षीय दलबहादुर पुन, ५२ वर्षीय जानसिंह पुन र सहवीर खत्री छन्। सबैको उपचार रेउघास्थित रोल्पा अस्पतालमा भइरहेको छ ।