नेपाली कांग्रेसका सभापति शेरबहादुर देउवा नेतृत्वको सरकारमा मन्त्रीहरु फेरिने कुराले नयाँ मोड लिएको छ । यसअघि सत्ता साझेदार नेकपा एकीकृत समाजवादीबाट मन्त्रीहरुलाई फिर्ता बोलाएर नयाँ नाम सिफारिस गरिएको थियो ।
तर, गठबन्धन र एकीकृत समाजवादीमा नै नेताहरुबीच कुरा नमिल्दा यो कार्यान्वयनमा जान सकेन ।
अर्कोतिर, नेकपा एकीकृत समाजवादीका नेताहरुले मन्त्रीहरु छिटै फेरिने दाबी गरिरहेका छन् । नेकपा एकीकृत समाजवादीका मेटमणि चौधरीले बिहीबार दिउँसोसम्म मन्त्रीहरु फेरिने र नयाँ मन्त्रीहरुले सपथ लिने दाबी गरेका छन् ।
अर्कोतिर, नेकपा माओवादी केन्द्रले पनि सरकारमा रहेका आफ्ना मन्त्रीहरु फेर्ने तयारी गरेको नेकपा माओवादी केन्द्रकै नेता वर्षमान पुनले बताएका छन् ।
उनले पार्टीभित्र मन्त्री फेर्ने आवाज उठेको र यसको गृहकार्यसमेत सुरु भएको दाबी गरेका छन् । उनले नेकपा एकीकृत समाजवादीले मन्त्री फेर्ने निर्णय गरेसँगै माओवादी केन्द्रमा पनि यस्तो निर्णय हुन लागेको बताएका हुन् ।
‘पार्टीमा मन्त्री फेर्नेबारे कुनै छलफल भएको छैन,’ उनले भनेका छन्, ‘तर, समाजवादीले पूरै सेट फेर्ने भएपछि हाम्रोमा पनि दाबब आएको छ ।’ उनले कांग्रेस र सत्ता साझेदार जसपामा पनि यो दबाब भएको बताएका छन् । ‘तर, यो दबाबलाई नेताहरुले कति थेग्नुहुन्छ थाहा छैन,’ उनले भनेका छन्, ‘हाम्रो अझै छलफल सुरु भएको छैन, अहिले आवाज उठिरहेको छ ।’
संसद भवनमा सन्चारकर्मीहरुसँग कुराकानी गर्दै वर्षमान पुनले यस्तो बताएका हुन् ।
नेकपा माओवादी केन्द्रकै अर्का एक नेताले फरकधारसँग भने पार्टीमा छलफल प्रारम्भ भएको र अहिलेका मन्त्रीहरुको पर्फमेन्स राम्रो नभएकाले मन्त्री फेरिने कुरा ठूलो विषय नहुने बताएका छन् ।
‘तर, सरकारमा मन्त्री फेर्ने या नफेर्ने भन्ने विषयमा एउटा पार्टीले मात्र निर्णय गरेर पनि हुँदैन,’ उनले भने, ‘यसमा गठबन्धनमा रहेका शीर्ष नेताहरुले छलफल गरेर निष्कर्ष निकाल्नुहुन्छ ।’
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
