विवेकशील साझा पार्टीका नेता तथा पूर्वअध्यक्ष रवीन्द्र मिश्रले आफू राप्रपा प्रवेश गर्ने कुनै तयारी नरहेको बताएका छन् । केही सञ्चारमाध्यमले ‘रवीन्द्र प्रवेश राप्रपा प्रवेश गर्ने तयारीमा’ भनेर समाचार प्रकाशन गरेपछि मिश्रले यस विषयमा आफ्नो प्रतिक्रिया जनाएका हुन् । 

उनले बुधबार आफूविरुद्ध सञ्चारमाध्यममा आएका समाचार झुट भएको बताए । यद्यपि मिश्रले सशक्त शक्ति निर्माण हुने किसिमको सम्मीलन/एकीकरण/ध्रुवीकरणमा भने आफ्नो चासो रहेको उल्लेख गरेका छन् । 

‘जतिसुकै विकसित भए पनि हरेक देशमा अर्थ–राजनीतिक रूपमा ‘कल्याणकारी एजेण्डा’ बोकेका तर राजनीतिक–सामाजिक रूपमा ‘मडरेट कन्जर्भेटिभ स्पेस’लाई सशक्तरूपमा प्रतिनिधित्व गर्ने पार्टी हुन्छ । नेपालमा अहिले त्यस्तो पार्टी छैन,’ मिश्रले फेसबुकमा लेखेका छन्, ‘म एक्लै कतै जोडिएर त्यो सम्भव छैन । तर, सशक्त शक्ति निर्माण हुने किसिमको कुनै पनि सम्मीलन/एकीकरण/ध्रुवीकरणमा भने मेरो चासो कायमै रहने छ ।’

उनले देशलाई शिरमा राख्ने र नेपाली समाजको भावनालाई नेतृत्व गर्ने ‘मडरेट कन्जरभेटिभ’ पार्टीको सख्त अभाव रहको पनि उल्लेख गरेका छन् । मिश्रले अनुमान र एक पक्षीय रूपमा दिइएको सूचनाको भरमा समाचार प्रकाशित नगर्न पनि आग्रह गरेका छन् ।