जनकपुरधाममा ‘जनकपुरधाम हेरिटेज एप’ को शुभारम्भ गरिएको छ । जनकपुरधाम उपमहानगरपालिकाका लागि युकेएड र सुदृढ परियोजनाद्वारा निर्माण गरिएको मोबाइल एप बुधबार एक कार्यक्रमका बीच नगरप्रमुख मनोजकुमार साहले शुभारम्भ गरेका हुन् ।
 
नगर प्रमुख साहले एपको माध्यमबाट जनकपुरधामका पर्यटकीय स्थलको बारेमा विश्वले थाहा पाउनुको साथै यहाँ आउने पर्यटकलाई एक स्थानबाट अर्को स्थानसम्म पुग्न सहज हुने बताए । उनले जनकपुरधाममा वर्षभरि मनाइने सांस्कृतिक कार्यक्रमबारे सो एपमा उल्लेख गर्न सुझाबसमेत दिएका छन् । एपमा अंग्रेजी, नेपाली, मैथिली र हिन्दी भाषा समावेश गरिएको छ ।
 
सो एपको माध्यमबाट जनकपुरधामका करिब एक सय पर्यटकीय स्थलको भ्रमण सहजै गर्न सकिने आइटी अफिसर अनिलकुमार अनतले बताए । यो एप तत्काल एन्ड्रोएड मोबाइलमा मात्र चल्ने जनाइए पनि केही दिनमै सबै प्रकारको मोबाइलमा चल्ने बताइएको छ ।
 
जनकपुरधाम उपमहानगरपालिकाको आधिकारिक वेबसाइटमा गएर स्क्यान गरी मोबाइलको प्ले स्टोरबाट यो एप राख्न सकिनेछ । सो एपमा जनकपुरधामका मुख्यमुख्य पर्यटकीय स्थललाई सहजै मोबाइलमा हेर्न सकिनेछ ।
 
कार्यक्रममा जनकपुरधाम उपमहानगरपालिकाकी उपप्रमुख किशोरी साह, प्रमुख प्रशासकीय अधिकृत प्रधुम्नप्रसाद उपाध्याय, बेलायती दूतावासकी सल्लाहकार सविता थापालगायत एपसँग सम्बन्धित संस्थाका पदाधिकारीको उपस्थिति थियो ।