बागमती प्रदेशको प्रदेश सभा बैठक आगामी बिहीबार बस्दै छ । प्रदेश सचिवालयका अनुसार बागमती प्रदेशसभाको चालु १० औँ अधिवेशनको २६ औँ बैठक बस्न लागेको हो । बागमती प्रदेश सभा, कार्य व्यवस्था परामर्श समितिको आइतबार बसेको बैठकले २६ औँ बैठक आज दिउँसो १ बजे बस्ने निर्णय गरेको प्रदेश सचिवालयले जनाएको छ । 

यसअघि २९ असारमा बसेको प्रदेशसभा बैठकले ५ वटा अध्यादेश स्वीकृत गर्दै बैठक अनिश्चित कालका लागि स्थगन भएको थियो ।

 २९ गतेको बैठकले बैठकले ‘प्रदेश निजामती सेवाको गठन, सञ्चालन र सेवाका सर्तहरू सम्बन्धमा व्यवस्था गर्न बनेको अध्यादेश’,  ‘स्थानीय तहका सेवाको गठन तथा सञ्चालन सम्बन्धमा व्यवस्था गर्न बनेको अध्यादेश’ र ‘विभूषण सिफारिस तथा सम्मान र पदकसम्बन्धी ऐन, २०७६ लाई संशोधन गर्न बनेको अध्यादेश’, ‘मदन भण्डारी स्वास्थ्य विज्ञान प्रतिष्ठान ऐन, २०७६ लाई संशोधन गर्न बनेको अध्यादेश’ र ‘प्रदेश युवा परिषद् ऐन, २०७६ लाई संशोधन गर्न बनेको अध्यादेश’ स्वीकृति प्रदान गरेको थियो ।