काठमाडौं– गण्डकी प्रदेशका सांसद राजीव गुरुङ उर्फ दीपक मनाङेले प्रदेशसभा सदस्यको शपथ लिएका छन् । केहीबेर अघि गण्डकी प्रदेशसभाका सभामुख नेत्र अधिकारीले मनाङेलाई शपथ गराए ।

शपथ खुवाएलगत्तै सभामुख अधिकारीले सांसद मनाङेलाई टीका लगाएर बधाई दिए । सँगै, उपसभामुख र प्रदेश सरकारका मन्त्रीहरुले पनि उनलाई बधाई दिए । 

गत निर्वाचनमा मनाङेले मनाङको प्रदेशसभा ‘ख’बाट वाम गठबन्धनको समर्थनमा स्वतन्त्रबाट चुनाव जितेका थिए । 

चुनाव जिते पनि ज्यान मार्ने उद्योगसम्बन्धी पुरानो मुद्दामा सर्वोच्चले गरेको फैसलाका कारण उनले शपथ लिन पाएका थिएनन् । करिब ८ महिना जेल बसेपछि सर्वोच्चले नै थुनामुक्त गर्न आदेश दिएपछि छुटेका मनाङेले अहिले आएर शपथ लिएका हुन् ।

शपथपछि खुशी व्यक्ति गर्दै मनाङेले भने, ‘९ महिना जेलमा बसेँ, अब केही दिन कुरौँ भनेर कुरेको थिएँ ।’ सरकारलाई राम्रो काममा सहयोग गर्ने उनले बताए । आफू तत्काल कुनै पार्टीमा प्रवेश गर्ने सोच नबनेको उनले प्रतिक्रिया दिए ।