अख्तियार दुरुपयोग अनुसन्धान आयोगले वृहत्तर जनकपुर क्षेत्र विकास परिषद्मा छापा मारेको छ । अख्तियारले वृहत्तरमा शनिवार पाँच घण्टा लामो छापा हानेर केही योजनाका फाइल नियन्त्रणमा लिएको हो ।

आयोगको कार्यालय बर्दिबासबाट खटेको टोलीले घुम्ती शौचालयको कागजातसहित करिब तीनवटा योजनाको फाइल नियन्त्रणमा लिएको अख्तियारका प्रमुख गोपालकुमार अधिकारीले जानकारी दिए । 

उनले आयोगमा विभिन्न उजुरीहरू परेपछि कार्यालयबाट सो सम्बन्धी कागजातहरू माग गरिएकोसमेत बताए । वृहत्तरले जानकी मन्दिरमा गरेको विद्युतीकरणमा व्यापक अनियमितता भएको भन्दै उजुरी परेपछि यसअघि पनि अख्तियारले छापा हानेर सो सम्बन्धी कागजात नियन्त्रणमा लिएको थियो । सो मुद्दालाई अख्तियारले मुल्तवीमा राखेको छ ।

वृहत्तरले काम नै नगरी मिलेमतोमा उपभोक्ता समिति तथा ठेकेदारलाई भुक्तानी दिएको, प्राविधिकले मूल्यांकनभन्दा बढी रकम निकासा गरेको लगायत गाडी खरिदमा समेत व्यापक अनियमितता भएको उजुरी परेका छन् ।

वृहत्तरका कार्यकारी अधिकृत बलराम ठाकुरले दानमा दिइएको गाडी आफ्नो श्रीमती इन्दुलेखा कुमारी ठाकुरको नाममा नामसारी गराइ बेचेको कागजात पनि अख्तियारले नियन्त्रणमा लिएको छ ।