पोखरामा एक महिलामाथि सामूहिक बलात्कार गरेको आरोपमा आठजना पक्राउ परेका छन् ।

१४ भदौमा पोखरा–७ शान्तिनगरबाट कारमा लिफ्ट मागेकी एक महिलामाथि सामूहिक बलात्कार भएको उजुरी कास्की प्रहरीमा परेको थियो । 

१४ गते बिहान शान्तिनगरमा लिफ्ट दिएका व्यक्तिले ती महिलालाई कास्कीको माछापुच्छ्रे गाउँपालिका लगेर बलात्कार गरेको भन्दै पीडित महिलाले प्रहरीमा उजुरी दिएकी थिइन् ।

उजुरीमा महिलालाई माछापुच्छ्रे गाउँपालिका–३ मा रहेको एक बङ्गुर फार्ममा लगेर ९ जनाले पालैपालो बलात्कार गरेको उल्लेख छ ।  ‘बंगुर फार्ममा रहेको कर्मचारी बस्ने कोठामा ९ जनाले पटकपटक बलात्कार गरेको पीडित महिलाले जाहेरीमा उल्लेख गरेकी छिन् । पीडित महिलाले १५ गते बेलुकी नै उजुरी दिएकी थिइन्,’ कास्की प्रहरी प्रवक्ता डिएसपी सुन्दर तिवारीले जानकारी दिए । 

बलात्कारमा संलग्न रहेको आरोप लागेका ९ जनामध्ये ८ जना पक्राउ परिसकेका र फरार रहेका एक जनाको खोजी भइरहेको प्रवक्ता तिवारीले बताए । 

उनका अनुसार पक्राउ परेकालाई जिल्ला अदालत कास्कीबाट पहिलोपटक सात दिन र दोस्रोपटक पाँच दिनको म्याद थप गरी अनुसन्धान भइरहको छ ।