तराई मधेश लोकतान्त्रिक पार्टीका अध्यक्ष वृषेशचन्द्र लालले मधेस आन्दोलनबाट प्राप्त उपलब्धिको रक्षा, मधेसको पहिचान, सम्मान तथा स्वाभिमानको रक्षाका लागि आफू चुनावी मैदानमा उत्रिएको बताएका छन् । 

आगामी मंसिर ४ गते हुने प्रतिनिधिसभा सदस्यको निर्वाचनमा महोत्तरी क्षेत्र नम्बर–३ बाट उम्मेदवारी दिएका लालले संघियतालाई समाप्त पार्ने मनसायका साथ देशमा गठबन्धनको राजनीति सुरु गरिएको आरोपसमेत लगाएका छन् । 

लालले देशमा सिद्धान्तहीन राजनीति चलिरहेकाले सत्तारुढ गठबन्धन र एमाले–जसपा गठबन्धनले निर्वाचन प्रणालीको मर्ममाथि प्रहार गरेको आरोप लगाए । 

राजनीतिमा पुस्ता हस्तान्तरणको समय आइसकेको अवस्थामा केही राजनीतिक दलहरुले गठबन्धनको नाममा पुरानै अनुहारलाई दोर्होयाउने र आफ्नो पदलोलुप्ता पूरा गर्ने कुचेष्टा मात्र गरिरहेको आरोप लगाए । 

उनले गठबन्धनसँग कुनै राजनीतिक एजेण्डा नरहेकाले कुनैपनि गठबन्धनलाई मत नदिन आम मतदातासँग आग्रहसमेत गरेका छन् ।

महोत्तरी–३ मा लालसँगै सत्ता गठबन्धनको तर्फबाट लोकतान्त्रिक समाजवादी पार्टीका अध्यक्ष महन्थ ठाकुर र एमाले–जसपा गठबन्धनको तर्फबाट जसपा नेता हरिनारायण यादवले समेत उम्मेदवारी दिएका छन् ।
 
महोत्तरी–३ मा एकडारा गाउँपालिकाका ५ वटा वडा, मटिहानीका ९ वटै वडा, जलेश्वरको १२ वटै वडा, पिपरा गाउँपालिकाका ६ वडा र मनरा सिस्वा नगरपालिकाका ३ वडा गरी कूल ३५ वडा रहेका छन् ।

२०७४ को निर्वाचनमा सहजै जित निकाल्न सफल भएका लोसपा अध्यक्ष ठाकुरलाई यस पटक त्यहाँ जित्न मुस्किल देखिन्छ । ठाकुरका लागि यस पटक परिस्थिति फेरिएको छ ।

यसअघिको निर्वाचनमा ठाकुरले २६ हजार ८४५ मत ल्याएर निर्वाचित भएका थिए । उनका निकटतम प्रतिद्वन्द्वी नेकपा एमालेका विजयकुमार चौधरीले ८ हजार ६७६ मतमात्र प्राप्त गरेका थिए । तर यस ५ वर्षको अवधिमा महन्थले आफ्नो क्षेत्रमा जनताको अपेक्षा अनुसारको काम गर्न नसकेकोले उनको जित अनिश्चित बनेको त्यस क्षेत्रका मतदाता बताउँछन् । 

यसअघि स्थानीय तहको निर्वाचनमा पनि लोसपाले राम्रो प्रदर्शन गर्न सकेको छैन । महोत्तरी–३ का ३५ वडामध्ये लोसपाले ७ वडामा मात्र जित निकाल्न सकेको छ । 

त्यहाँ यस पटक विभिन्न राजनीतिक दलका १० र स्वतन्त्रतर्फ ११ गरी कुल २१ जना उम्मेदवार चुनावी मैदानमा रहेका छन् । जसमध्ये महन्थका लागि तमलोपाका वृशेषचन्द्र लालले मुख्य चुनौती दिएको देखिएको छ । 

राजनीतिबाट सन्यास लिने समय आइसकेको बेलामा अध्यक्ष ठाकुरले फेरि यसपटक पनि उम्मेदवारी दिएर नयाँ पुस्तालाई राजनीतिबाट बञ्चित गरेको अध्यक्ष लालको आरोप छ । 

लाल भन्छन्, ‘ठाकुरजीसँगको मेरो मित्रता मुद्दाका लागि थियो । तर, उहाँहरुले मुद्दा नै विसर्जन गरेपछि अब मित्रता पनि रहेन । यसपटक उनलाई जनताले विश्वास गर्ने छैनन् ।’

उनले ठाकुरलगायतका नेताहरु मधेसको मुद्दासँग खेलबाड गर्न थालेपछि आफू आफ्नो बाटो लागेको बताएका छन् । 

उनले भने, ‘नेपाली कांग्रेसको लामो राजनीति गरेका ठाकुर २०४८ सालदेखि नै लगातार निर्वाचन लड्दै आएको नेता छन् । २०४८, २०५१ र २०५६ सालमा सर्लाहीबाट निर्वाचित भएका उनी २०६४ र २०७० को संविधान सभा निर्वाचनमा आफ्नै पूर्व सहयोगीबाटै पराजित भएका थिए । यसपटक पनि उनलाई मुस्किल नै छ ।’