कुनै बेला प्राथमिक उपचार गराउनसमेत बिरामी जान नचाहने अस्पतालमा यति बेला सेवा लिनेको भीड हुने गरेको छ । जिल्ला अस्पताल सुनसरीले आफ्नो धुमलिँदो छविलाई सुधार्दै सेवा प्रवाहलाई प्राथमिकता दिएसँगै अस्पताल पुग्ने बिरामीको सङ्ख्या बढ्न थालेको हो । 

जहाँ एका बिहानै पुर्जा काटेर पालो पर्खनेको भीड थामी नसक्नु छ । पालो कुरेरै भए पनि उपचार गराउनेको सङ्ख्या दिनानुदिन बढ्दो छ । लामो समय स्वार्थगत राजनीति र आर्थिक अनियमितता बाहेक नचाहनेहरूको चङ्गुलबाट उम्कन नसकेको इनरुवा अस्पतालबाट यति बेला भने सेवाग्राहीले परिवर्तनको अनुभूति गर्न पाएका छन् । 

स्रोत साधनको उपलब्धताको आधारमा अस्पतालले २४ सै घण्टा विशेषज्ञ डाक्टर सहितको सेवा थालेसँगै अस्पतालप्रतिको आम सर्वसाधारणको धारणा समेत बदलिएको छ । अस्पतालको सेवाप्रति विश्वास जगाएको छ । 

जसको पछाडि एक ‘जिद्दी डाक्टर’ को भूमिका अहम् रहेको स्थानीयहरू बताउँछन् । नाम बदनाम अनि गुमनाम बन्न पुगेको अवस्थाबीच कार्यक्षेत्र रोजेर आएका डाक्टर देवराज घिमिरेको जिद्दीपनले नै यति बेला अस्पताल कायापलट भएको हो । डाक्टर घिमिरेको साथमा यति बेला सारा गाउँ नै लागिपरेको बताउँछन्, सञ्चारकर्मी राजेन्द्र पोखरेल । 

उनले डाक्टर घिमिरेले आफ्नो जिद्दी पना त्यागेको भए अस्पतालको दुरावस्था यति बेला पनि रही रहने जिकिर गरे । उनले हरेक क्षेत्रमा सुधारको लागि हठी र सन्की मान्छेको आवश्यक पर्ने कुरा महसुस गरेको भन्दै उनले स्थानीयहरू व्यापक भ्रष्टाचारको ठाउँमा अहिले उपचार पाएसँगै खुसी भएको बताए । 

त्यस्तै सामाजिक अभियन्ता विनीता दाहालको अनुभव पनि सञ्चारकर्मी पोखरेलको भन्दा फरक छैन । उनी मानिसले गर्न चाहेको खण्डमा असम्भव नहुने बताउँछन् ।

अस्पतालमा बिरामीको चाप बढ्दै जानुमा अस्पताल सुविधा सम्पन्न हुँदै जानु र चिकित्सकको पर्याप्तता, सरल र सहज सेवा प्रवाह प्रमुख कारकका रूपमा हेरिएको छ । कुनै समय औषधि खरिद लगायता प्रशासनिक खर्च अपारदर्शिता जस्ता आर्थिक अनियमिततामा रुमल्लिएको अस्पतालले यति बेला मासिक ५० लाख बढी आम्दानी गरिरहेको छ ।

प्राथमिक उपचार गराउनसमेत बिरामीहरू जान नचाहने अस्पतालले यति बेला इको, इसीजी, इन्डोस्कोपी, मुटु, हाड जोर्नी, स्त्री तथा प्रसूति, मानसिक रोग तथा दाँतको विशेषज्ञ सेवा लिनको लागि इनरुवा अस्पताल पुग्ने गरेका छन् । जसले अस्पताल प्रतिको विश्वसनीयता दर्साएको सहजै अनुभूति गर्न सकिन्छ । जिल्ला अस्पताल सुनसरीका मेडिकल सुपरिटेन्डेन्ट डा. देवराज घिमिरे जिद्दी डाक्टरको रूपमा आफू चिनिए पनि आफूले स्वास्थ्य सेवा नागरिकले पाउनका लागि २४ सै घण्टा अस्पताल खुल्नुपर्ने माग गर्दै आएको बताए । उनले सबै उपचार अस्पतालमा नै हुनुपर्छ र नागरिकले सहज उपचार पाउनुपर्छ भन्ने कुरामा जिद्दी रहेको बताए ।

सदरमुकाममा रहेको जिल्ला अस्पतालमा इनरुवावासी र जिल्लाका कोसी, हरि नगर, गढी, देवानगञ्ज, रामधुनी लगायतका क्षेत्रबाट बिरामीहरू उपचार गराउन आउने गरेका छन् । अस्पतालले ब्लड बैंकसमेत सञ्चालनमा ल्याउन लागेको डाक्टर घिमिरेले बताए ।