आउँदो ४ मंसिरमा हुने प्रतिनिधिसभा र प्रदेशसभाको निर्वाचनका लागि दलहरूले आजदेखि प्रचारप्रसार गर्न पाउने भएका छन् । चुनाव आउन १७ दिन बाँकी रहँदा निर्वाचन आयोगले बिहीबारदेखि १ मंसिरसम्म दलहरूले प्रचारप्रसार गर्नसक्ने जनाएको हो ।  

निर्वाचन आचारसंहिता, २०७९ को दफा १३ ले राजनीतिक दल, उम्मेदवार, दलको भातृ संघ-संगठनलगायतले प्रचारप्रसार सम्बन्धी कार्य गर्दा पालना गर्नुपर्ने आचरणको व्यवस्था गरेको छ । 

दफा १३ को (म) मा उम्मेदवारको अन्तिम नामावली प्रकाशन भएपछि मतदान हुने दिनभन्दा १७ दिनअघिदेखि मात्र निर्वाचन प्रचारप्रसारअन्तर्गत जुलुस, आमसभा, कोणसभा गर्न र सञ्चारमाध्यममा निर्वाचनसम्बन्धी सामग्री प्रकाशन वा प्रसारण गर्न सक्ने व्यवस्था छ । 

आयोगले आचारसंहिता प्रतिकूल हुने गरी गतिविधि नगर्न राजनीतिक दल, उम्मेदवार तथा सम्बन्धित पक्षसँग आग्रह अनुरोध गरेको छ ।