काभ्रेमा गाडी दुर्घटना हुँदा दुईजनाको मृत्यु भएको छ। दुर्घटना हुँदा तीनजना घाइते भएका छन् । 

 जिल्ला प्रहरी कार्यालय काभ्रेका डिएसपी राजकुमार श्रेष्ठका अनुसार मंगलबार दिउँसो सवा २ बजे पनौती नगरपालिका–२ सिलाभन्ज्याङस्थित कुशादेवीबाट नयाँगाउँ जाँदै गरेको बा ४ ख ६७२३ नम्बरको पराल बोकेको गाडी ब्रेक फेल भएर दुर्घटनामा परेको हो । 

दुर्घटनामा घाइते भएका कुशादेवी बस्ने ४० वर्षीय रविन आचार्य र बेथानचोक गाउँपालिका–२ बस्ने ५० वर्षीय शिवविक्रम केसीको अस्पताल पुर्‍याउँदा मृत्यु भएको हो। 

बेथानचोक गाउँपालिका–२ का ४५ वर्षीय सारदा तिमल्सिनाको टाउको, घाँटी र दुवै हात–खुट्टामा गम्भीर चोट लागेको प्रहरीले जनाएको छ। उनको सिरमेमोरियल अस्पतालमा उपचार भइरहेको छ ।