तेक्वान्दोका पूर्वखेलाडी दीपक विष्टले राष्ट्रिय टिम तयारीको निर्देशकको जिम्मेवारी पाएका छन् । राष्ट्रिय खेलकुद परिषद् (राखेप) ले यसअघि तालिम तथा प्रशिक्षण विभागमा रहेका विष्टलाई राष्ट्रिय टिम तयारीको निर्देशकको जिम्मेवारी दिएको हो । 

उनी २०६५ सालमा तेक्वान्दो प्रशिक्षकको रूपमा राखेप प्रवेश गरेका थिए । विष्ट दक्षिण एसियाली खेलकुद (साग) को लगातार चार संस्करणमा स्वर्ण जित्ने एक मात्र नेपाली खेलाडी हुन् । 

उनले आठौँदेखि ११औँ सागमा स्वर्ण जितेका थिए । विष्टले २००२ को बुसान एसियाड तथा २००६ को दोहा एसियाडीमा कास्य जितेका थिए ।
विष्ट ओलम्पिकमा छनोट भएर खेल्ने पहिलो नेपाली पुरुष खेलाडी हुन् । 

उनले सन् २००८ मा चीनको बेइजिङ भएको २९औँ ओलम्पिक छनोट चरण पार गरेर खेलेका थिए ।