बागमती प्रदेशका पूर्वमन्त्री बलराम पौडेलको सवारी दुर्घटनामा मृत्यु भएको छ। कांग्रेस चितवनका नेता पौडेलको बुधबार दिउँसो नवलपुरको गैँडाकोटमा सवारी दुर्घटनामा मृत्यु भएको हो । 

जिल्ला प्रहरी कार्यालय नवलपुरका अनुसार गैँडाकोट नगरपालिका–५ कालीगण्डकी चोकमा पूर्वमन्त्री पौडेल सवार ना४६प ७७५९ नम्बरको मोटरसाइकललाई ग१ख ८५४७ नम्बरको बसले ठक्कर दिँदा पौडेलको मृत्यु भएको हो । 

अपराह्न साढे १२ बजे भएको दुर्घटनामा परी गम्भीर घाइते भएका पौडेललाई उपचारका लागि जिल्ला सरकारी अस्पताल भरतपुर चितवन लगिएको थियो । दिउँसो १ बजेतिर उपचारका क्रममा उनको निधन भएको हो। 

ठक्कर दिने बस र बसचालकलाई प्रहरीले नियन्त्रणमा लिएको जनाएको छ।