नेपाली सेनाको रिक्त रथी पदमा उपरथी अशोकराज सिग्देल सिफारिस भएका छन् । 

सैनिक मुख्यालयमा शुक्रबार बसेको सेनाको बढुवा समितिको बैठकले सिग्देललाई रथी पदमा बढुवा गर्ने निर्णय गरेको हो । सेनाले रथी सीताराम खड्काको अध्यक्षतामा बढुवा समिति गठन गरेको थियो । 

बलाधिकृतरथी सरोजप्रताप राणाले अवकाश पाएपछि उनको ठाउँमा वरियतामा अघि रहेका उपरथी ताराध्वज पाण्डेलाई सेनाको बोर्डले रथी बढुवाका लागि सिफारिस गरेको थियो । तर, पाण्डेको उमेर विवादका कारण राजीनामा दिएका थिए । उनको राजीनामा स्वीकृत भएपछि सिग्देलको बढुवा प्रक्रिया अघि बढेको हो ।

सेनामा रथीको दरबन्दी कात्तिक ११ देखि रिक्त छ । वर्तमान प्रधानसेनापति प्रभुराम शर्माले आगामी भदौ २४ मा अवकाश लिँदैछन् । उनको ठाउँमा अहिले रथी बढुवा हुने सैनिक अधिकृत सेनाको भावी प्रधानसेनापति नियुक्त हुने भएकाले यो पदलाई महत्वका साथ हेरिएको छ ।