टर्की र सिरियामा सोमबार बिहान गएको ७.८ रेक्टर स्केलको शक्तिशाली भूकम्पमा परी मृत्यु हुनेको संख्या १५ हजार नाघेको छ । टर्कीमा भूकम्पबाट १२ हजार र सिरियामा ३ हजारभन्दा बढी व्यक्तिको मृत्यु भएको सरकारी सञ्चारमाध्यमले जनाएका छन् । 

सञ्चारमाध्यमका अनुसार हालसम्म टर्कीमा १२ हजार ३ सय ९१ जनाको मृत्यु हुनुका साथै ६२ हजार ९१४ जना घाइते भएका छन् । सिरियामा भूकम्पबाट ३ हजार ४२ जनाको मृत्यु भएको स्वास्थ्य मन्त्रालयले जनाएको छ ।  

अत्यधिक चिसो मौसमबीच उद्धार जारी रहे पनि सहायता संस्थाहरूले भग्नावशेषमा पुरिएका व्यक्तिहरूलाई जीवितै भेटाउने सम्भावना कम हुँदै गएको बताइरहेका छन् । यो सँगै मृतकको संख्या अझै बढ्ने देखिन्छ । 

अत्यधिक चिसोका बाबजुद रातको समयमा समेत खोजी प्रयासहरू जारी रहँदा भग्नावशेषमुनि बाँचेकाहरूलाई भेट्ने समय कम हुँदै गएको हो ।