नेकपा एमालेका एक नेताले प्रधानमन्त्री पुष्पकमल दाहालमाथि गम्भीर आरोप लगाएका छन् । एमाले पोलिटब्युरो सदस्य तथा पूर्वमन्त्री पुरुषोतम पौडेलले प्रधानमन्त्री दाहाललाई भारतीय विदेश सचिव विनयमोहन क्वात्राले हेगमा मुद्दा उठाइदिने धम्की दिएपछि प्रचण्डले एमालेसँग गठबन्धन तोडेर कांग्रेसको पछि लागेको आरोप लगाएका हुन् ।

रौतहटको चन्द्रपुर नगरपालिकाको आयोजित अभिमुखीकरण कार्यक्रमलाई सम्बोधन गर्दै नेता पौडेलले प्रधानमन्त्री प्रचण्डले भारतसँग डराएर एमालेसँगको पुस १० को सम्झौता तोडेर कांग्रेसलाई राष्ट्रपति दिएको बताए ।

नेकपा एमाले सरकार र शक्तिमा हुँदा भारतलाई ‘कम्फरटेबल’ नहुने भएकाले भारतकै इशारा अनि धम्कीमा प्रचण्डले एमालेसँग सहकार्य तोडेर कांग्रेससँग सहकार्य गर्न पुगेको उनको दाबी छ । क्वात्राले प्रचण्डलाई भारतले भनेअनुसार नगरे हेगमा पुर्याउने धम्की दिएको उनको भनाइ थियो ।