नेकपा एमालेका नेता भीम रावलले सत्तारुढ गठबन्धनको सार्वजनिक नीति तथा कार्यक्रममाथि प्रश्न उठाएका छन् । 

शनिबार साँझ सामाजिक सञ्जालमार्फत रावलले सार्वजनिक नीति तथा कार्यक्रममाथि आठवटा प्रश्न गरेका हुन् ।

उनले नीति तथा कार्यक्रममा संविधानमा परिमार्जन गर्ने सन्दर्भमा के कुरा थप्न र संशोधन गर्न खोजिएको हो भनेर प्रश्न गरेका छन् । त्यस्तै, विदेशमा रहेका नेपालीलाई मताधिकार दिने प्रक्रिया र विधि के हो भनेर पनि उनले प्रश्न गरेका छन् ।

गठबन्धनको संस्कृति विकास गर्ने भनिएकोप्रति उनले सोधेका छन्, ‘के अबदेखि दलले एक्लै चुनाव लडेर बहुमत ल्याउन नहुने हो ?’ साथै उनले धर्मको आधारमा हुने विभेद हटाउने भनिएकोप्रति उनले सोधेका छन्, ‘कुन धर्मलाई कसले गरेको कस्तो र के विभेद हटाउने भनिएको हो ?’