गण्डकी प्रदेश सरकारको नेतृत्व आलोपालो हुनसक्छ : सुरेन्द्रराज पाण्डे

नेपाली कांग्रेस गण्डकी प्रदेशसभाका संसदीय दलका नेता सुरेन्द्रराज पाण्डेले गण्डकी प्रदेश सरकारको नेतृत्व आलोपालो हुनसक्ने बताएका छन् । 

नेपाली कांग्रेस गोरखाले बुधबार बिहान आयोजना गरेको पत्रकार भेटघाटमा बोल्दै नेता पाण्डेले अन्य प्रदेशमा जस्तै गण्डकी प्रदेशमा पनि कांग्रेस र माओवादी केन्द्रले आलोपालो सरकारको नेतृत्व गर्न सक्ने बताए । 

‘अहिले प्रदेश सरकारको नेतृत्व आलोपालो भन्ने कुरा आएको छ,’ नेता पाण्डेले भने, ‘गण्डकी प्रदेशमा मात्र होइन, सातवटै प्रदेशमा आलोपालो सरकारको नेतृत्व हुनसक्छ ।’

नेपाली कांग्रेसका तर्फबाट मुख्यमन्त्रीका दाबेदारसमेत रहेका नेता पाण्डेले प्रदेशको निर्वाचनको चुनाव लड्ने क्रममा नै आफूले मुख्यमन्त्रीका लागि गृहकार्य गरेको बताए । 

‘प्रदेश सरकारको नेतृत्वको सन्दर्भमा सबै कुराको टुंगो प्रदेशमा पनि लाग्दैन,’ उनले भने, ‘यी विषय शीर्ष नेताका बीचमा छलफल भएर केन्द्रीय तहमै टुंगो लाग्ने कुरा हुन् ।’

नेकपा (एमाले)को नेतृत्वमा रहेको गण्डकी प्रदेश सरकारलाई नेकपा (माओवादी केन्द्र)ले दिएको समर्थन फिर्ता लिएपछि प्रदेश सरकार अल्पमतमा रहेकाले मुख्यमन्त्री खगराज अधिकारी सरकार बसिरहनु उचित नहुने उनको तर्क छ । 



‘हामीले सरकार अल्पमतमा परिसक्यो, अल्पमतको सरकारमा बसिरहनु स्वाभिमान देखिँदैन भन्दा पनि उहाँ सरकारमा बसिरहनुभएको छ,’ नेता पाण्डेले भने, ‘अब बहुमत पाउने सम्भावना नभएकाले उचित निकास लागि दिनका लागि पनि सुझाब दिइसकेका छौँ ।’



  • प्रकाशित मिति : चैत २९, २०७९ बुधबार १७:२१:१२

फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।


यस विषयसँग सम्बन्धित समाचार

यो सामग्री सेयर गर्नुहोस्

यो सामग्री सेयर गर्नुहोस्

यो पनि नछुटाउनुहोस्
मल्टिमिडिया