उद्याेग क्षेत्रले वातावरणमा पारेको असर न्यूनीकरण सम्बन्धमा उद्याेग, वाणिज्य तथा आपूर्ति मन्त्रालयमा छलफल भएको छ । उद्याेग, वाणिज्य तथा आपूर्तिमन्त्री रमेश रिजालको संयोजकत्वमा साे छलफल भएको हाे ।

छलफलमा उद्योग परिसंघ, विभिन्न उद्योगी, सरोकारवाला मन्त्रालयका प्रतिनिधिको उपस्थिति थियो । छलफलमा संघ, प्रदेश तथा स्थानीय तहले आफ्ना नीति तथा कार्यक्रममा उद्योग क्षेत्रबाट पर्न सक्ने असर न्यूनीकरणका विषयलाई समावेश गर्नुपर्ने मन्त्रालयका सचिव डा. तोयनारायण ज्ञवालीले बताए । त्यसैगरी इआइए/आइइ स्वीकृत गर्ने निकायहरुले स्वीकृत प्रतिवेदनमा उल्लेखित न्यूनीकरणका उपाय पालना गरे/नगरेको विषयमा नियमित अनुगमन गर्ने विषयमा पनि छलफल भएको थियो । 

त्यस्तै, मन्त्रालयमा पर्साको सिर्सिया नदीमा प्रदूषण नियन्त्रणका लागि परियोजना सञ्चालन गर्ने विषयमा पनि छलफल भएको थियो ।  

छलफलमा उपस्थित उद्याेगीले उद्याेगमा देखिएका विभिन्न समस्याबारेमा मन्त्री रिजाललाई जानकारी गराएका थिए । मन्त्री रिजालले आफू उद्याेगीहरुकै पक्षमा रहेको भन्दै समस्या समाधानका लागि हरप्रयास गर्ने बताए ।