राष्ट्रिय महिला आयोगकी अध्यक्ष कमला पराजुलीले संखरापुरमा ज्येष्ठ नागरिक ग्राम बनाउने क्रममा आफूले आर्थिक अनियमितता नगरेको स्पष्टीकरण दिएकी छन् । 

शुक्रबार प्रतिनिधि सभाअन्तर्गतको महिला तथा सामाजिक मामिला समितिको बैठकमा बोल्दै अध्यक्ष पराजुलीले संखरापुरमा ‘संकल्प ज्येष्ठ नागरिक ग्राम’ निर्माण गर्दा कुनै प्रकारको आर्थिक अनियमितता नगरेको स्पष्ट पारेकी हुन् ।

बैठकमा सांसदले अध्यक्ष पराजुलीको नेतृत्व रहेको संस्थाले जेष्ठ नागरिक ग्राम बनाउन सरकारबाट पैसा लिएर पनि भवन बन्न नसकेको कुरा उठाएसँगै उहाँले सो कुराको स्पष्टोक्ति दिएकी हुन् ।  

उनले ज्येष्ठ नागरिक ग्राम बनाउन नेपाल सरकारबाट ६ करोड १ लाख रुपैयाँ लिएर काम गरेको भए पनि २०७२ सालको भूकम्पले भवनमा क्षति पुगेका कारण भवन सम्पन्न गर्न नसकेको बताइन् । 

‘त्यो कुनै पनि पैसा मैले खाएको होइन । मैले चलाएको होइन । मेरो अकाउन्टमा लगेर राखेको होइन । मैले घरजग्गा जोडेको होइन । मैले केही पनि गरेको होइन । कुन–कुन कामका लागि त्यति पैसा खर्च भयो भनेर सम्पूर्ण खर्च विवरण, अडिट रिपोर्ट सबै कुराहरू मन्त्रालयमा पेस भएको छ । कर कार्यालयमा पनि पेस भएको छ,’ पराजुलीले भनिन्, ‘जिल्ला समन्वयमा पनि पेस भएको छ । त्यसपछि शंखरापुर नगरपालिकाले हामी यसलाई टेकओभर गर्छौँ । र, आफ्नो तरिकाले अगाडि बढाउँछौ भनेर आफ्नो नगर समितिमा निर्णय भयो । त्यो निर्णय भएपछि संस्थाबाट सम्पूर्ण प्रक्रिया पूरा गरियो । मैले त्यो संस्था छोडे पनि ।’

 उनले क्षतिग्रस्त भवनको भवन विभागबाट गएको इन्जिनियर टोलीले अनुगमन गरेको र भवन निर्माण कार्यलाई निरन्तरता दिन नमिल्ने प्रतिवेदन दिएका कारण भवन बनाउन नसकेको बताइन् । भत्काउनका लागि पनि १ करोड रुपैयाँभन्दा बढी पैसा लाग्ने भएपछि त्यत्तिकै बसिराखेको सो भवन संखरापुर नगरपालिकाले आफ्नो स्वामित्वमा लिएको पनि पराजुलीले जानकारी दिइन् ।

‘करिब १३/१४ महिना अगाडिबाट ती सबै कुराहरू संखरापुर नगरपालिका मातहत पुर्जा लगि, पास गरी सबै कुरा भए पनि सकेको छ । मुद्दा फैसला पनि भएको हो । पूर्णपाठ पनि आइसकेको हो । कसैले पुनरावेदनमा जान्छ भने सर्वोच्चमा जान्छ भने, आफू दोषी भए, गलत अभीष्टले काम गरेको छु भन्ने दोषी प्रमाणित भएमा म सजायको भागी हुन तयार छु,’ अध्यक्ष पराजुलीले भनिन् । 

उनले अदालतबाट समेत सो विषयको मुद्दामा फैसला भइसकेको भन्दै कसैलाई चित्त नबुझे पुनरावेदन वा सर्वोच्च अदालत जान पनि चेतावनी दिइन् । रकम हिनामिनामा आफ्नो संलग्नता देखिएमा सजायको भागिदार हुन तयार रहेको पराजुलीको भनाइ छ ।