राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले देश यथास्थितिमा बस्न नसक्ने भन्दै नयाँ सम्झौता गरेर अगाडि बढ्नुपर्ने बताएका छन् । बुधबार प्रतिनिधिसभा बैठकमा आफ्नो धारणा राख्दै उनले देश वर्तमान अवस्थामा अडिराख्न नसक्ने बताएका हुन् ।

लिङ्देनले देशले अवलम्वन गरेको प्रणाली नै दोषी रहेको उल्लेख गर्दै यो प्रणालीबाट अपेक्षित परिवर्तन गर्न सम्भव नभएको बताए । ‘हामीले अवलम्बन गरेको प्रणाली दोषी छ । त्यसैले अब यही निर्वाचन प्रणाली, यही नियुक्ति प्रणाली, यही ऐन निर्माण गर्ने विधिबाट हामीले अपेक्षा गरेको परिवर्तन सम्भव छैन मात्र होइन कुनै हालतले देश अगाडि बढ्न सक्दैन । अहिले यो कुरा राप्रपाले मात्रै होइन,’ लिङ्देनले भने, ‘यो उत्कृष्ट व्यवस्था हो भनेर ल्याउने, लड्ने सबैले पनि स्विकारीसक्नुभएको अवस्था हो । त्यसैले म आग्रह गर्छु, परिवर्तनको नाममा जे व्यवस्था निर्माण गर्नुभयो, त्यो गणतन्त्र होइन । 

उनले अहिलेको प्रणाली गणतन्त्र नभइ लुटतन्त्र भएको टिप्पणीसमेत गरे । लिङ्देनले कसैलाई निषेध गरेर मुलुक अगाडि बढ्न सक्दैन भन्नेकुरा प्रमाणित भइसकेको भन्दै नयाँ सम्झौता गरेर अगाडि बढ्नुपर्नेमा जोड दिए ।  

‘अहिले जनताले के भन्छन्, लुटतन्त्र हो । केही सीमित राजनीतिक दल र ती सीमित राजनीतिक दलका पनि सीमित नेताहरूका मुठीमा देश कैद भयो । उनीहरूको लागि मात्रै भयो । त्यसकारण अब देश यहीँ अडिराख्न सक्दैन । देशलाई यही अवस्थामा राखिराख्न सकिँदैन । म भन्न चाहन्छु, सबै दलहरूको ध्यानाकर्षण गर्न चाहन्छु, केवल सरकारको मात्रै होइन, सबै माननीय सदस्यहरूको ध्यानाकर्षण गर्न चाहन्छु,’ लिङ्देनले भने, ‘राप्रपाले पछाडि फर्किने कुरा गरेको होइन । तर, अब देश यहीँ बसिराख्न पनि सक्दैन । अब नयाँ सम्झौता गरेर अगाडि जानुपर्छ । कसैलाई निषेध गरेर मुलुक अगाडि बढ्दैन भन्ने कुरा प्रमाणित भइसक्यो । हाम्रो अहम् तुष्टिको लागि देशलाई बन्धक नबनाऔँ । सबै मिलेर नयाँ सम्झौता गरेर नवीन बाटोमा देशलाई अगाडि लैजाऔँ भन्ने कुरा म आग्रह गर्न चाहन्छु ।’ 

उनले विभिन्न भ्रष्टाचारका काण्ड आए पनि त्यसको निष्पक्षरूपमा छानबिन हुन नसकेको पनि आरोप लगाए ।