नेदरल्याण्ड्सले नेपालमा जारी त्रिकोणात्मक टी–२० सिरिजमा लगातार दोस्रो जित निकालेको छ । दोस्रो जित निकाल्नेक्रममा नेदरल्याण्ड्सले बिहीबार नामिबियालाई ५९ रनले हरायो । 

पहिलो खेलमा नेदरल्याण्ड्सले नेपाललाई दुई रनले हराएको थियो । यता नामिबियाको यो पहिलो हार हो । उसले पहिलो खेलमा नेपाललाई २० रनले हराएको थियो । आफ्नो दोस्रो खेलमा नेदरल्याण्ड्सले दिएको २ सय ४८ रनको लक्ष्य पछ्याएको नामिबियाले निर्धारित २० ओभरमा ८ विकेट गुमाएर १ सय ८८ रन मात्र बनाउन सक्यो । 

उसका लागि जेन ग्रीन र जन फ्राइलिन्स्कले ४२/४२, जेपी कोएट्जेले २६, कप्तान जेजे स्मिथ र रुबेन रुबेन ट्रम्पलम्यानले १९/१९ रन जोडे । नेदरल्याण्ड्सका लागि टिम भ्यान डर गुग्टेनले चार ओभरमा २६ रन दिएर सर्वाधिक दुई विकेट लिए । त्यसअघि कीर्तिपुरस्थित त्रिवि मैदानमा जारी खेलमा टस जितेर पहिला ब्याटिङ रोजेको नेदरल्याण्ड्सले निर्धारित २० ओभरमा ५ विकेट गुमाएर २ सय ४७ रन बनायो ।

त्रिवि मैदानमा टी–२० आईमा कुनै पनि टिमले बनाएको यो अहिलेसम्मकै उच्च स्कोर हो ।  उसका लागि ओपनिङ ब्याटर माइकल लेभिटले शतकीय इनिङ खेले । ६२ बलको सामना गरेका उनले ११ चौका र १० छक्कासहित १ सय ३५ रन बनाए । यस्तै, साइब्रान्ड एंगलब्रेच्टले ४० बलमा ७ चौका र ५ छक्काको सहयोगमा ७५ रनको इनिङ खेले ।

तेजा निदामनारुले तीन बलमा तीन छक्कासहित १८ रन जोडे । नामिबियाका लागि रुबेन ट्रम्पलम्यानले ४ ओभरमा ४६ रन दिएर सर्वाधिक दुई विकेट लिए । जारी सिरिजमा नेपालले तेस्रो खेलमा शुक्रबार नेदरल्याण्ड्सको सामना गर्नेछ ।