राष्ट्रिय प्रजातन्त्र पार्टीका अध्यक्ष एवं सांसद राजेन्द्र लिङ्देनले अहिले भएको सत्ता हेरफेर स्वार्थको गठ जोड भएको बताएका छन् । बुधबार प्रतिनिधि सभामा उनले स्वार्थ मिले टाँसिने, नमिले छुटिने भन्दै देश र जनताको वर्तमान परिस्थितिलाई केन्द्रमा राखेर सरकार नबनेको बताए ।
उनले भने, ‘जति नै सिद्धान्तको लेप लगाए पनि अहिलेको यो सत्ता हेरफेर भनेको स्वार्थको गठ जोड हो । स्वार्थ मिले टाँसिने, नमिले छुटिने । सत्ता निर्माण हुँदा बनेको ७, ८ बुँदेबाट पनि त्यही देखिन्छ । देश र जनताको वर्तमान परिस्थितिलाई केन्द्रमा राखेर यो सरकार बनेको होइन । सत्तालाई आफ्नो सुरक्षा कबजको रूपमा प्रयोग गर्ने उद्देश्यबाट गठबन्धन निर्माण भएको हो ।’
यस्तै उनले सत्ता केन्द्रित चलखेलमा राप्रपा सहभागी नहुने भन्दै गठबन्धनलाई राप्रपाले विश्वासको मत नदिने बताए । राजनीतिप्रति धेरै अविश्वास पैदा भएको भन्दै जनता पनि राजनीतिबाट निराश भएको उल्लेख गरे ।
उनले भने, ‘किन यस्तो हुन्छ की एउटा नेताले अघिल्लो दिन अर्को नेतालाई अछुतो जस्तो व्यवहार गर्छ र भोलिपल्टै त्यही नेता महान् र राजनेता हुन्छ यस्तो भएपछि राजनीतिप्रति जनताको विश्वास कसरी बढ्छ ।’
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।