जनकपुर– प्रदेश २ सरकारले गणतन्त्रवादी नेता स्व. रामराजाप्रसाद सिंहको सालिक निर्माण गर्ने भएको छ । 

प्रदेश सरकारले आयोजना गरेको तीनदिने गणतन्त्र दिवस कार्यक्रमको समापनका क्रममा प्रदेश २ का मुख्यमन्त्री लालबाबु राउतले सो घोषणा गरेका हुन् । 

समापन समारोहमा बेल्दै मुख्यमन्त्री राउतले गणतन्त्रको स्थापनाका लागि बलिदानी दिने अमर सहिदलाई स्मरण गर्दै उनीहरुले देखाएको सपना पूरा गर्ने अभिभारा आफूहरुको काँधमा आएको बताए । 

गणतान्त्रिक व्यवस्थाको सफलताको लागि प्रदेश सरकार सुशासन र समृद्धिलाई मूल आधार बनाएर अघि बढिरहेको दाबी गर्दै राउतले आगामी दिनमा समेत यसलाई निरन्तरता दिने उनले प्रतिबद्धता जनाए । 

स्व. सिंहले गणतन्त्र स्थापनाको लागि अटुट संघर्ष गरेको स्मरण गर्दै राउतले उनको सम्झनामा प्रदेश सरकारले यसै वर्ष सालिक निर्माण गर्ने उद्घोष गरे ।
 
नेपाली सेनाको टोलीले सो अवसरमा राष्ट्रिय झन्डामाथि सलामी अर्पण गरेको थियो ।