Wed, 11 Dec, 2019


भारत–पाक बढ्दो तनावः पाकिस्तानले भारतसँग व्यापारिक तथा कुटनीतिक सम्बन्ध अन्त्य गर्यो
फरकधार / साउन २३, २०७६

एजेन्सी– भारत प्रशासित कश्मिरमा अनुच्छेद ३७० को निष्प्रभावी गरेकाले पाकिस्तानले भारतसँग कुटनीति सम्बन्ध सिमित राख्ने तथा दुई देशबीचको व्यापारिक सम्बन्ध तोड्ने घोषणा गरेको छ । 



पाकिस्तानी प्रधानमन्त्री इमरान खानको अध्यक्षतामा भएको पाकिस्तानको राष्ट्रिय सुरक्षा समिति बैठकमा यो निर्णय लिइएको हो । 

बैठकमा पाकिस्तानका विदेशमन्त्री, रक्षामन्त्री, गृहमन्त्रीसहित सेना तथा जासुसी संस्थाका अधिकारी थिए ।

अन्तर्राष्ट्रिय सन्चारमाध्यमहरुमा समाचार आएअनुसार पाकिस्तानले दिल्लीमा रहेका आफ्ना राजदूतलाई फिर्ता बोलाएको छ । त्यस्तै, पाकिस्तानमा रहेका भारतीय राजदूतलाई पनि फिर्ता जान भनिएको छ । 

'मैले १९९० ताकाको मिलिटेन्सी पनि देखेको छु, तर यस्तो माहोल कहिल्यै देखिनँ' – एक कस्मिरवासीकाे बयान

यो विषयमा पाकिस्तानले संयुक्त राष्ट्रसंघ तथा सुरक्षा परिषद्मा कुरा उठाउने तय भएको छ । साथै, पाकिस्तानको स्वतन्त्रता दिवसको अवसरमा अब कश्मिरमा एकजुटता प्रदर्शन गर्ने भनिएको छ । यता, भारतको स्वतन्त्रता दिवसलाई पाकिस्तानमा कालो दिनका रुपमा लिने निर्णय गरिएको छ । 

यो बैठकमा पाक प्रधानमन्त्री इमरान खानले भारतले मानवअधिकार उल्लंघन गरेको र यस विषयमा सबै कुटनीतिक आयोगहरुमा जानकारी दिन निर्देशन दिएका छन् । 

पाकिस्तानी संसदको संयुक्त सत्रमा पनि यो विषयमा चर्चा गरिएको छ । पाकिस्तानका मानवअधिकार मन्त्री शिरिन मजारीले भारतले कश्मिरमा गरेका निर्णयहरु युद्ध अपराधजस्तै भएको बताएका छन् । 

यसबीच पाकिस्तानले आफ्नो हवाई क्षेत्रको कोरिडोर बन्द गरिदिएको छ । समाचार एजेन्सी पिटिआईका अनुसार भारतका उडानहरुलाई अब पाकिस्तानी हवाइ क्षेत्र प्रयोग गर्न दिइने छैन ।

भारतले आज हटाएकाे 'अनुच्छेद ३७०' के हाे ? यसले जम्मु–कस्मिरलाई के–के विशेषाधिकार दिन्थ्याे ?


यस विषयसँग सम्बन्धित समाचार

यो सामाग्री सेयर गर्नुहोस्


यो पनि नछुटाउनुहोस्