Sun, 22 Sep, 2019


एसिसी यू–१९ एसिया कप क्रिकेटमा नेपालकाे पहिलाे खेल श्रीलंकासँग
फरकधार / भदौ ४, २०७६

काठमाडौं– यसै महिना श्रीलंकामा आयोजना हुने एसिसी यू–१९ (उन्नाइस वर्षमुनि) एसिया कप क्रिकेटमा नेपालले आयोजक श्रीलंकाको सामना गर्दै प्रतियोगिताको उद्घाटन गर्ने भएको छ ।



यही भदौ १९ देखि २८ गतेसम्म आयोजना हुने उक्त प्रतियोगितामा नेपालले भदौ २० गते श्रीलंकाको सामना गर्दै प्रतियोगिताको उद्घाटन गर्नेछ । एसियन क्रिकेट काउन्सिल (एसिसी) ले सार्वजनिक गरेको खेल तालिकाअनुसार नेपाल समूह ‘बी’मा परेको छ । नेपालको समूहमा आयोजक श्रीलंकासँगै बंगलादेश र संयुक्त अरब इमिरेट्स (युएई) रहेका छन् ।

त्यसैगरी, समूह ‘ए’मा भारत, पाकिस्तान, अफगानिस्तान र कुवेत रहेका छन् । नेपालले आफ्नो दोस्रो खेलमा भदौ २२ गते बंगलादेशसँग खेल्नेछ भने समूह चरणको अन्तिम खेल भदौ २४ गते युएईसँग खेल्नेछ ।

राउण्ड रोबिन लिगपछि दुवै समूहको शीर्ष दुई टोलीले सेमिफाइनलमा स्थान बनाउनेछन् । असार महिनामा मलेसियामा सम्पन्न भएको एसिसी यू–१९ इन्टर्न रिजनको उपाधि जितेर नेपाल एसिया कपमा छनोट भएको थियो । त्यतिवेला नेपालले फाइनल खेलमा हङकङलाई ६ विकेटले पराजित गर्दै उपाधि हासिल गरेको थियो ।
 


यो सामाग्री सेयर गर्नुहोस्


यो पनि नछुटाउनुहोस्