काठमाडौं– विश्वमै आफ्नो छुट्टै पहिचान बोकेको एकताको प्रतीक नेपालको राष्ट्रिय झन्डालाई उच्च प्राथमिकतामा राख्दै सरकारले यसपटकको संविधान तथा राष्ट्रिय दिवस झन्डामय बनाएर मनाउने तयारी थालेको छ । विगतभन्दा फरक रूपमा कार्यक्रम थप गरी एकता, समृद्धि र अठोटको प्रतीक राष्ट्रिय झन्डालाई शिरमा राखेर दिवस मनाउने तयारी थालिएको गृहसचिव प्रेमकुमार राईले बताए ।

अन्तर्राष्ट्रिय खेलमा दर्शकको हातमा झन्डा हुँदा त्यसले देशको प्रतिनिधित्व गर्छ । त्यो देख्दा सम्बन्धित देशका जनतालाई आफ्नो देश भनेर गर्वको अनुभूति हुन्छ । त्यसैले सरकारले राष्ट्रिय भावनालाई थप जागृत गराउन झन्डालाई प्राथमिकता दिएर दिवस मनाउन लागेको हो । नेपालको संविधान २०१९ देखि हालको स्वरूपको नेपालको राष्ट्रिय झन्डाले  मापदण्डसहित प्रवेश पाएको हो । वैज्ञानिक र वैदिक विशेषतासहित यसको मापदण्ड इन्जिनियर तथा वास्तुविद् शंकरनाथ रिमालले तयार गरेका हुन् । 

राष्ट्रिय झन्डा, राष्ट्रको गौरव र सम्मानको प्रतीक हो । राष्ट्रिय महत्वलाई झल्काउँदै जातजाति र समुदायबीच एकता कायम गर्नमा झन्डाको अहम् भूमिका हुन्छ । विश्वकै पृथक र आकर्षक मानिने नेपालको तीनकुने आकारको झन्डा आफैँमा नेपाल र नेपालीको पहिचान हो । दुई त्रिकोणमध्ये माथि चन्द्र र तल सूर्य अ‌ंकित छ, जसले चन्द्रजस्तै शीतल र सूर्यको जस्तै तेज र अटलताको संकेत गर्छ । नेपालको झन्डामा सिम्रिक रङ छ, यो क्रान्तिको प्रतीक पनि हो र किनारामा शान्तिको प्रतीकका रूपमा गाढा नीलो रङ छ । 

दिवसका दिन असोज ३ मा उपस्थित भई झन्डा बोकेर र्यालीमा सहभागी हुन सबै कर्मचारीलाई सरकारले आग्रह गरेको छ । दिवसका सन्दर्भमा ‘संविधान दिवस तथा राष्ट्रिय दिवस हर्षोल्लासका साथ मनाऔँ, घरघरमा राष्ट्रिय झन्डा फहराऔँ’ भन्ने नारा तय गरिएको गृहसचिव राईले जानकारी दिए ।

‘उक्त नारा मोबाइल सन्देशमार्फत हरेकलाई पठाइन्छ, झन्डाका रङका पोशाक, चंगा आदि निर्माण गर्ने र घरघरमा झन्डा राख्न आह्वान गर्ने तथा हरेक कार्यक्रममा झन्डा फहराइनेछ, कार्यक्रम झन्डामय हुन्छ’, गृहसचिव राईले भने । 

दिवसलाई झन्डामय बनाउन लागिएकामा खुसी व्यक्त गर्दै प्रधानमन्त्री केपी शर्मा ओलीले झन्डाले राष्ट्रिय एकता र उपलब्धिलाई मौन ढंगले दृढतापूर्वक अभिव्यक्त गर्ने प्रतिक्रिया दिए । उनले झन्डालाई घरमा, मुटुको अगाडि र पछाडि पर्नेगरी वा हातमा या शिरमा राखेर सम्मानपूर्वक प्रयोग गरी राष्ट्रिय उत्सव मनाउनसमेत आह्वान गरे ।

यसका लागि आवश्यक सहयोग गर्न निजी क्षेत्र र सम्बद्ध संघसंस्थालाई आह्वान गर्ने निर्णय भएको गृह मन्त्रालयले जनाएको छ । दिवसका अवसरमा आयोजना हुने नियमित कार्यक्रमका अतिरिक्त नयाँ कार्ययोजनाका साथ थप कार्यक्रम तय गरी राष्ट्रिय झन्डाको प्रयोगलाई प्राथमिकता दिइएको छ । झन्डा कागज वा कपडाकाृे प्रयोग गर्न भनिएको छ । प्लास्टिकको झन्डालाई निषेध गरिएको छ ।

स्थानीय तहमा समेत राष्ट्रिय झन्डा प्रदर्शन गर्न लगाउने, संविधान जारी भएको दिनमा वस्तु वा सेवामा विशेष छुट गर्न आग्रह गर्ने कार्यक्रम तय भएको छ । यसपालि झन्डालाई बढी महत्व दिई घरघरमा झन्डा राख्न र हातहातमा लिनका लागि भनिएको छ । दिवसमा आयोजना हुने र्यालीलाई समेत झन्डामय बनाइनेछ ।

स्कुल तथा कलेजमा राष्ट्रिय झन्डा तथा राष्ट्रभक्तिको विषयमा कविता, वक्तृत्वकला हाजिरिजवाफ प्रतियोगिता सञ्चालन गर्न, सार्वजनिक चोकमा राष्ट्रिय गान तथा  राष्ट्रभक्तिका गीत, कन्सर्ट आयोजना गरी महोत्सव गर्ने व्यवस्था मिलाउन मूल समारोह समितिले आह्वान गरेको छ । 

शुभकामना, एसएमएसका साथै डिस्प्ले बोर्ड, सिनेमा हलमा चलचित्र सुरु हुनुअघि झन्डा र राष्ट्रिय गान बजाउन लगाउने तथा उपत्यकाभित्र सरकारी कार्यालय तथा महानगर नगरपालिकाले राष्ट्रिय झन्डा सजाएर नगरको शृंगार तथा सजावट गर्न तथा राष्ट्रिय झन्डा रिले दौड र क्रिकेट प्रतियोगिता गर्न समितिले आग्रह गरेको छ । 

यस्तै विभिन्न मठमन्दिर, चर्च, मस्जिद, बौद्ध विहार, गुरुद्वारामा राष्ट्र, राष्ट्रियता र संविधानका लागि जीवन उत्सर्ग गर्ने शहीदहरुको आत्मशान्तिका लागि पूजापाठ र प्रार्थना गर्न आग्रह गर्ने निर्णय भएको छ । संघ, प्रदेश र स्थानीय तहका सबै सरकारी कर्मचारीहरु राष्ट्रिय झन्डासहितको र्याली गर्दै असोज ३ गते मूल समारोहस्थलमा सहभागी हुन, टुँडिखेलमा सांस्कृतिक र राष्ट्रिय पोसाकमा राष्ट्रिय झन्डासहित भेला हुन भनिएको र हेलिकाेप्टरबाट पुष्पवृष्टि र झन्डा प्रदर्शन गरिने भएको छ । 

दिवसको पूर्वसन्ध्यामा भदौ २७ देखि तयारी तीव्र पारिनेछ । तयारीका लागि आजै प्रधानमन्त्री केपी शर्मा ओलीको अध्यक्षतामा ३८ सदस्यीय मूल समारोह समिति गठन भएको छ । कार्यक्रम सम्पन्न गर्न सञ्चार तथा सूचना प्रविधिमन्त्री गोकुलप्रसाद बाँस्कोटाको संयोजकत्वमा प्रचारप्रसार उपसमिति, काठमाडौं महानगरपालिकाका प्रमुख विद्यासुन्दर शाक्यको संयोजकत्वमा मञ्च सजावट तथा व्यवस्थापन समिति र काठमाडौंका प्रमुख जिल्ला अधिकारीको संयोजकत्वमा चौर, कवाज, व्यायाम तथा झाँकी व्यवस्थापन समन्वय उपसमिति गठन गरिएको छ । 

असोजको २ देखि ४ गतेसम्म हुने मुख्य कार्यक्रममा सरसफाइ, विभिन्न प्रचारात्मक कार्यक्रम तथा दीपावलीसहित राष्ट्रिय झन्डा प्रदर्शन हुनेछ । मुख्य दिन असोज ३ गते भने सैनिक मञ्च टुँडिखेलमा राष्ट्रपति विद्यादेवी भण्डारीको उपस्थितिमा विशेष समारोहको आयोजना गरिनेछ ।

यस्तै विदेशस्थित राजदूतावासमा पनि विभिन्न कार्यक्रम गरी दिवस मनाउने तथा प्रदेश र स्थानीय सरकारले पनि आ–आफ्नै तरिकाले दिवस मनाउने कार्यक्रम तय भएको छ । सबै कार्यक्रममा राष्ट्रिय झन्डालाई प्राथमिकता दिइने मूल समारोह समितिले जनाएको छ ।