काठमाडौं– आइतबार राष्ट्रिय सभागृहमा नेकपा अध्यक्ष पुष्पकमल दाहाल प्रचण्डलाई लक्षित गरी जुत्ता प्रहार गर्ने रतन सिरुवालाई सात दिन हिरासतमा राख्न प्रहरीले अनुमति पाएको छ ।

जिल्ला प्रशासन कार्यालय, काठमाडौंले अभद्र व्यवहारसम्बन्धी कसुर गरेको अभियोगमा उनलाई हिरासतमा राखेर अनुसन्धान गर्न अनुमति दिएको छ ।

नेकपा नेता भरतमोहन अधिकारीको स्मृतिसभा आइतबार सभागृहमा सम्पन्न भएकाे थियो । सो कार्यक्रमलाई सम्बोधन गरेर आफ्नो आसनमा फर्कने क्रममा प्रचण्डमाथि जुत्ता प्रहार भएको थियो । तर, जुत्ताले उनलाई लागेको भने थिएन । 

लगत्तै पक्राउ परेका रतन अहिले प्रहरीनियन्त्रणमै छन् । उनलाई हिरासतमा राख्न प्रहरीले जिप्रकासँग अनुमति मागेको थियो ।

सो घटनाको छानबिनका लागि प्रहरीले ३ सदस्यीय समिति पनि गठन गरिसकेको छ । समिति अपराध अनुसन्धान महाशाखाका एसएसपी सहकुलबहादुर थापाको नेतृत्वमा गठन गरिएको छ ।