काठमाडौं– कोरोना महामारीविरुद्ध लड्नका लागि आइतबार बसेको मन्त्रिपरिषद् बैठकले एउटा निर्णय गर्यो– केन्द्रीय कोरोना कोष बनाउने । यही कोषमा त्यही बैठकमा नै सबै मन्त्रीहरुले एक एक महिनाको तलब दिने पनि घोषणा गरे । 

केही समयअघि मात्र सेक्युरिटी प्रिन्टिङ प्रेस खरिदमा कमिसनको बार्गेनिङ गरेको अडियो सार्वजनिक भएपछि मन्त्री पद गुमाएका नेपाल कम्युनिस्ट पार्टीका नेता गोकुल बाँस्कोटाले पनि त्यो कोषमा आफूले योगदान गर्ने सोचे । 

तर, उनले यसलाई सहज रुपमा भन्न सकेनन् । सायद, उनलाई त्यही विषय निस्किन्छ भन्ने अनुमान भयो । त्यसैले त उनले ट्विटरबाट यो घोषणा गर्दा लेखे– जसले जसरी लिउन्, त्यो उनको आग्रह वा बुझाइको सीमाभित्रको विषय हो । 

बाँस्कोटाले यो विषयमा यसरी लेख्नु पर्ने आवश्यकता नै देखिँदैन । उनले सहजै एक महिनाको तलब कोरोना कोषमा दिने निर्णय गरेको छु भनेको भए हुन्थ्यो !

तर, नेपालीमा उखान छ नि, बनको बाघले खाओस् या नखाओस्, मनको बाघले खाएपछि । यो कुरा उनको सन्दर्भमा मेल खाएको हुनुपर्छ ।

त्यसैले पनि हुनुपर्छ, बाँस्कोटाले यो कुरा ट्विट गरेपछि उनले जति प्रशंसा पाएका छन्, त्योभन्दा बढी आलोचना पाएका छन् ।

जस्ले जसरि लिउन त्याे उनकाे आग्रह वा बुझाईकाे सिमा भित्रकाे विषय हाे तर मेरो एक महिना काे तलब काेरना बिरुध्दकाे सरकारी काेषमा जम्मा गर्ने निर्णय गरेकाे छु ।

— Gokul Prasad Baskota (@GokulPBaskota) March 23, 2020