पछिल्लो समय लकडाउनका कारण काम गर्न नसकेका व्यक्तिहरुलाई सरकारे विभिन्न राहत उपलब्ध गराउँदै आएको छ । यस्तो राहत स्थानीय तहको संयोजनमा वितरण गर्दै आइएको छ । 

मुगुको सोरु गाउँपालिकामा पनि राहतमा चामल वितरण गरिएको थियो । तर, गाउँपालिकाको ११ नम्बर वडामा वडाध्यक्षले कुहिएको चामल राहतमा वितरण गरेपछि गाउँले मिलेर उनलाई त्यो चामल फर्काइदिएका छन् । 

वडाध्यक्ष अकवर शाहीले दैनिक ज्यालादारी मजदूरी गर्ने मानिसहरुलाई चामल बाँडेका थिए । वडामा २ सय ३४ घरमा ३० केजीका २ सय ५० बोरा चामल वितरण गरिएको थियो ।

चामलको बोरा खोलेर हेर्दा त्यसमा किरा लागेको देखिएको थियो । केही चामल डल्ला परेको थियो । वडाले कुहिएको चामल वितरण गरेपछि स्थानीय आक्रोशित भएका छन् ।