लकडाउनमा भारतीय सीमाबाट नेपाल प्रवेश गर्नेलाई कडाइ गर्नको लागि  निर्माण गरेको सुरक्षा पोष्टलाई भारतीयहरुले भत्काउन खोजेपछि सुरक्षाकर्मीले हवाई फायर गरेका छन् ।

सुवर्ण गाउँपालिका ३ पञ्चगछीयको दशगजा क्षेत्रमा निर्माण गरिएको सुरक्षा पोष्टलाई भारत तर्फबाट आएका स्थानीयहरुले भत्काउन खोजे पछि हवाई फायर गर्नु परेका सशस्त्र प्रहरी बल नेपाल नं.–१२ गण उत्तर झिटकैयाले जनाएको छ ।

सीमावर्ती हनुमानगँजका सयौको संख्यामा आएका भारतीयहरुले  ड्युटी गर्न निर्माण गरिएको पोष्टलाई भत्काउन खोज्दा सशस्त्र प्रहरीले उनीहरुलाई रोक्न एक राउन्ड हवाई फायर गरेको  प्रहरीले जानकारी दिएकाे छ । १२ बजे दुई भारतीयहरुले नेपाल तर्फ खेत रहेको र खेत हेर्न जान दिनुस भन्दा उनीहरुलाई रोकेर भारततर्फ नै  फर्काए पछि एकै चोटी सयौ संख्यामा आएर पोष्ट नै भत्काउन खोजे पछि स्थिती तनावपूर्ण बनेको थियाे ।

तनावपूर्ण स्थितीलाई नियन्त्रणमा गर्न सशस्त्र प्रहरीले हवाई फायर गरेपछि भारतीय पक्ष पछि हटेको र भारतीय सीमा सुरक्षा बल एसएसबीले समेत भारतीय पक्षलाई सम्झाए पछि अवस्था सामान्य बनेको हाे ।

त्यहाँ १५ जनाको संख्यामा सशस्त्र प्रहरी रहेका छन् । पोष्ट भत्काउन सशस्त्र प्रहरीका जवान माथि सीमावर्ती भारतीयहरुले अक्रमण गरेको जानकारी पाएपछि बाराका प्रहरी उपरीक्षक कृष्ण पगेनी, सशस्त्र प्रहरी उपरीक्षक सुवेदी लगाएत त्यस स्थानमा पुगेर घटनाको जानकारी लिएका छन् ।

दुई दिन पहिला मात्रै सीमा सुरक्षाबल एसएसबीले दशगजामा रहेको खेतमा काम गर्न गएको  बलिरामपुरका एक नेपालीलाई कुटपिट गरे पछि  नेपाली र भारतीय पक्ष बीच झडप भएको थियो । विश्रामपुर गाउँपालिका ४ बलिरामपुरका छोटेलाल साहलाई सीमा क्षेत्रमा किन आएको भन्दै एसएसबीले कुटपिट गर्दा त्यसलाई छोडाउन क्रममा दुबै पक्षबीच झडप भएको थियो।