पछिल्ला केही दिन प्रधानमन्त्री केपी शर्मा ओली र राष्ट्रपति विद्यादेवी भण्डारीबीच भेटघाट भएको छ । यी दुईको शुक्रबार अबेर साँझ भेटघाट भएको हो । 

पछिल्लो समय राजनीतिक माहोल तातिरहँदा प्रधानमन्त्री र राष्ट्रपतिबीच भएका यस्ता भेटघाटले राजनीतिज्ञहरुमा आशंका उत्पन्न गराइदिएको छ । यसअघि प्रधानमन्त्रीले आफ्नै चाहनामा ल्याएको दुई अध्यादेश राष्ट्रपतिले तत्काल जारी गरिदिएपछि कुनै राजनीतिक ‘सरप्राइज कदम’ लिन खोजिएको त होइन भन्ने आशंका राजनीतिज्ञहरुमा जाग्न थालेको हो । 

वैशाख यता मात्र प्रधानमन्त्री ओली र राष्ट्रपति भण्डारीबीच आधा दर्जनभन्दा बढी भेटघाट भएको छ । 

शुक्रबार साँझ चाहिँ प्रधानमन्त्री ओली झन्डै आठ बजे राष्ट्रपति निवास पुगेका थिए । उनी रातको ११ बजेमात्र प्रधानमन्त्री निवास फर्किएका छन् । 

पछिल्लो समय सत्तारुढ नेकपाले नै राष्ट्रपतिले पार्टीभित्रको अन्तर्संघर्षमा ओलीलाई साथ दिएको आरोप लगाउँदै आएका छन् ।