पछिल्लो समय स्वास्थ्य मन्त्रालयले कोरोनभाइरस संक्रमितको स्थायी ठेगाना दिन थालेपछि संक्रमितहरु कहाँ छन् भन्नेमा निकै अन्यौल कायम हुन थालेको छ ।
स्वास्थ्य मन्त्रालयले दिने जानकारीमा संक्रमितको स्थायी ठेगाना दिइने भएकाले यसमा समस्या पर्दै आएको हो ।
यसले मंगलबार पनि केही जिल्लाहरुमा त्रास फैलाएन मात्र प्रशासनलाई संक्रमित खोज्न पनि समस्यामा पार्यो ।
मंगलबार लमजुङका कोरोनाभाइरस संक्रमित भनिएका व्यक्ति काठमाडौंमा नै रहेको खुलेसँगै अब रामेछाप, नवलपरासीका संक्रमित पनि काठमाडौंमा नै रहेको खुलेको छ ।
रामेछापका पहिलो पटक र नवलपरासीका दोस्रो व्यक्तिमा कोरोनाभाइरस संक्रमण भएको पुष्टि भएको हो ।
रामेछापको खाँडादेवी गाउँपालिकाका एक व्यक्तिले ३० वैशाखमा थ्रोट स्वाब दिएका थिए । उनको परीक्षणको रिपोर्ट मंगलबार आएको हो ।
उनी अहिले काठमाडौंमा नै भएको जानकारी रामेछाप प्रशासनले दिएको छ ।
त्यस्तै, मंगलबार नै नवलपरासीमा एक महिलामा कोरोनाभाइरस संक्रमित भएको पुष्टि भएको थियो । यी महिला पनि काठमाडौंमा नै रहेको खुलेको छ ।
उनी नवलपरासीबाट २९ वैशाखमा काठमाडौं आएको खुलेको छ ।
लमजुङका तीन वर्षीय बालक पनि काठमाडौंमा नै भएको खुलेको छ ।
स्वास्थ्य मन्त्रालयले यसरी संक्रमितबारे जानकारी दिँदा संक्रमित कहाँ छन् भन्ने अन्यौल त पैदा गर्नु मात्र होइन, काठमाडौंमा अहिलेसम्म कतिजना संक्रमित भेटिए भन्नेमा पनि अर्को आशंका उत्पन्न गरेको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।