बलिउड अभिनेता सुशान्त सिंह राजपुतको अन्तिम चलचित्र ‘दिल बेचारा’ डिज्नी प्लस हटस्टारमा रिलिज भएको छ । चलचित्रमा सुशान्तको अपोजिटमा सन्जना सांघीले अभिनय गरेकी छिन् । दिल बेचाराले दर्शकबाट धेरै राम्रो प्रतिक्रियासमेत पाएको छ । 

अहिले दिल बेचारा फिल्म टोरेन्ट साइटमा अनलाइन लिक भएको खबर बाहिरिएको छ । पिंकभिल्लाको रिपोर्टअनुसार चलचित्र दिल बेचारा तमिलरकर्स नाम भएको वेबसाइटबाट लिक गरिएको छ । उक्त साइटमा फिल्म एचडी प्रिन्टमा उपलब्ध भएको पत्ता लागेको छ ।

तर, यसले चलचित्रको व्यापारमा कुनै असर पार्ने छैन । किनकि, चलचित्रलाई डिज्नी प्लस हटस्टारले कुनै रकम बिना नै देखाइरहेको छ । 

चलचित्रको कहानीमा किजी बासु नामकी एक केटी हुन्छिन् जो टर्मिनल क्यान्सरसँग लडिरहेकी हुन्छिन् । उनको जीवन औषधि, अक्सिजन सिलिन्डर र अस्पतालको वरिपरि घुमिरहेको हुन्छ । सोही समयमा इम्मानुअल राजकुमार जुनियर अर्थात सुशान्तसँगको रोमान्स फिल्ममा देख्न सकिन्छ ।

मुकेश छाबडाले निर्देशन गरेको चलचित्र दिल बेचारामा सैफ अली खानलाई पनि देख्न सकिन्छ ।