सामान्यतया हालसम्म मनसुन निष्क्रिय भई वर्षा रोकिइसक्नु पर्ने हो  । तर, यो वर्ष हालसम्म पनि देशभर वर्षा भइरहेको छ । यो वर्ष अत्यधिक वर्षा भएको र  बाढीपहिरोले धेरै जनधनको क्षतिसमेत भएको छ । यो वर्ष मनसुन अझै केही समय  सक्रिय रहने  जल तथा मौसम विज्ञान विभागको भनाइ छ । विभागका अनुसार आगामी तीन दिन देशभर सामान्यतया बदली रही केही स्थानहरूमा मेघगर्जन र चट्याङसहित हल्कादेखि मध्यम वर्षा हुनेछ । 

आइतबार देशभर सामान्य बदली रही केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको बताइएको छ । मनसुनको न्यूनचापीय रेखा नेपालभन्दा दक्षिणतर्फ रहनाका साथै भारतको मध्यप्रदेश तथा आसपासका क्षेत्रमा न्यूनचापीय प्रणाली अवस्थित रहेकाले वर्षाको सम्भावना रहेको विभागले जनाएको छ ।

हाल गण्डकी, सुदूरपश्चिम, प्रदेश नं १ र २ का अधिकांश भूभागमा सामान्यदेखि पूर्ण बदली रही अन्य भूभागमा आंशिकदेखि सामान्य बदली रहेको छ । त्यस्तै, वाग्मती, गण्डकी, सुदूरपश्चिम र प्रदेश नं १ का एक÷दुई स्थानमा हल्कादेखि मध्यम वर्षा भइरहेको विभागको भनाइ  छ । दिउँसो देशभर सामान्यतया बदली रही केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको मौसम पूर्वानुमान महाशाखाका मौसमविद् प्रतिभा मानन्धरले बताइन् ।