नेपाल उद्योग वाणिज्य महासंघका उपाध्यक्ष तथा आइएमई ग्रुपका अध्यक्ष चन्द्र ढकाललाई कोरोना भाइरस संक्रमण पुष्टि भएको छ । 

ढकालले आइतबार कोरोना परीक्षणका लागि स्वाब दिएका थिए । आफूमा कोरोना पोजेटिभ देखिए पनि स्वास्थ्यमा कुनै समस्या नरहेको ढकालले जानकारी दिए ।  आफूलाई कोरोना संक्रमण भएको जानकारी सामाजिक सञ्जाल फेसबुकमार्फत दिएका हुन्। उनलाई सोमबार बिहान कोरोना पुष्टि भएको हो।

परिवारका अन्य सदस्यको भने कोरोना रिपोर्ट नेगेटिभ आएको उनले जनाए ।

ढकालले जनस्वास्थ्यका मापदण्डहरु पालना गरेर सतर्कता र सजगता अपनाउँदा समेत पोजेटिभ देखिएको बताउँदै आफ्नो सम्पर्कमा रहेका सबैलाई सुरक्षित र आवश्यक स्वास्थ्य सजगता अपनाउन आग्रह गरेका छन्। संक्रमण पुष्टि भएपछि उनी होम आइसोलेसनमा बसिरहेका छन्।