चाडपर्वलाई लक्षित गर्दै धनगढीमा सुपथ मूल्य पसल सञ्चालनमा आएको छ । खाद्य व्यवस्था कम्पनीको संयोजकत्वमा सञ्चालित पसल आगामी मंसिर ६ गते सम्म सञ्चालन हुने बताइएको छ ।

कम्पनीसँगै साल्ट ट्रेडिङ कर्पोरेसन र दुग्ध विकास संस्थानकोे सहकार्यमा सुपथ पसल सञ्चालन गरिरहेका हुन् ।

चाडबाडको अवसरमा आम उपभोक्तालाई राहत दिने उद्देश्यले सुपथ मूल्य पसल सञ्चालनमा ल्याएको बताइएको छ । बजारमा कृत्रिम अभाव तथा महँगी बढ्दै जाँदा सुपथ मूल्य पसलबाट सस्तो मूल्यमा उपभोग्य वस्तु किन्न पाउँदा उपभोक्तालाई समेत सहज भएको छ ।

सुपथ मूल्य पसलबाट चिनी, नुन, चामल, साबुन र सेनिटाइजर लगायतका सामग्री बिक्री वितरण भइरहेका छन् ।

पसलमा चिनी प्रतिकिलो ७० रुपैयाँ र नुन प्रतिकिलो १८ रुपैयाँ मूल्य निर्धारण गरिएको छ । बाहिरको दरभन्दा चिनी प्रतिकिलोमा १० रुपैयाँ र नुन प्रतिकिलोमा दुई रुपैयाँ छुट गरिएको छ ।

सुपथ मूल्य पसलबाट उपभोक्ताले सामान किन्ने मात्रै नभएर बेच्ने पनि गरेको साल्ट ट्रेडिङ कर्पोरेशन कार्यालय धनगढीले जनाएको छ । यो वर्ष सुदूरपश्चिमका अन्य जिल्लामा भने सुपथ मूल्य पसल सञ्चालनमा आएको छैन ।

विगतमा कैलालीको टीकापुर, कञ्चनपुरको बेलौरी, महेन्द्रनगर र पहाडी जिल्लामा बैतडी, डडेल्धुरा, दिपायल लगायतका स्थानमा सुपथ मूल्यका पसल सञ्चालनमा ल्याइएका थिए ।