काठमाडौं : सिंहदरबारको मुलगेट अगाडि अवस्थित पृथ्वीनारायण शाहको सालिकमा माल्यार्पण गर्न पुगेकाहरूमाथि प्रहरीले दमन गरेपछि अभिनेत्री मनीषा कोइराला आक्रोशित भएकी छन्।

२९९ औँ पृथ्वी जयन्ती तथा राष्ट्रिय एकता दिवसका अवसरमा सिंहदरबार अगाडि भेला भएकाहरूमाथि निषेधित क्षेत्र तोडेको भन्दै प्रहरीले लाठीचार्जसहित दमन गरेपछि मनीषाले कडा प्रतिक्रिया दिएकी हुन्।

भद्रकाली क्षेत्रमा जम्मा भएर सिंहदरबार अगाडि तर्फ आइरहेका सर्वसाधरणलाई प्रहरीले पटक पटक रोकेर हस्तक्षेप गरेको थियो। त्यसक्रममा राप्रपाका एकजना अध्यक्ष पशुपति शमशेर जबरासहितलाई पनि लछारपछार गरिएको थियो।

अघिल्ला वर्षमा पनि सिंहदरबार अगाडिको सालिकमा माल्यार्पण गरिन्थ्यो। तर यस पटक ठूलो संख्यामा मानिसहरु सालिकतर्फ अघि बढेपछि स्थानीय प्रशासनले तोकेको निषेधित क्षेत्रमा भीड बढेको भन्दै प्रहरीले अवरोध गरेका थिए।

प्रहरी अवरोधका क्रममा सिंहदरबार अगाडि नै रहेकी मनीषाले त्यहाँको माहोल हेरिसकेपछि सरकारबारे प्रश्न उठाएकी हुन्। 'मैले आशा गरेकी थिएँ कि जनताको  राष्ट्रिय एकताका प्रतीकको सामूहिक भावलाई  सरकारले सम्मान गर्ने छ', उनले भनेकी छन्, 'तर उसको व्यवहार ठीक उल्टो देखियो। पृथ्वी नारायणको सालिक अगाडि नै सरकारको यो आपत्तिजनक कार्य?'

मनीषाले पृथ्वीनारायणको जन्मजयन्तीमा आएकालाई पनि प्रहरीले पानीको फोहरा र टियर ग्याँस हानेको भन्दै चित्त दुखाएकी छन्। 'पानीको फोहरा र टियर ग्याससहित तैनाथ प्रहरीलाई पठाउने?', उनले सोधेकी छन्, 'के यो नेपालीको सरकार नै हो?'

मैले आशा गरेकिथिए क़ि जनताको राष्ट्रीय एकता प्रतीकों सामूहिक भावलाई सरकार ले सम्मान गर्ने छ।तर उस्को व्यवहार ठीक उल्टो देखियो। पृथ्वी नारायणको शालिक अगाडी नै सरकार को यो आपत्तिजनक कार्य?
पानीको फोहरा र टियर ग्यास सहितनै तैनात प्रहरीलाई पठाउने, सरकार के नेपालीको सरकार नै हो?

— Manisha Koirala (@mkoirala) January 11, 2021