नेपाल कम्युनिष्ट पार्टी (नेकपा) प्रचण्ड–माधव पक्ष निकट अखिल नेपाल राष्ट्रिय स्वतन्त्र विद्यार्थी युनियनले प्रतिनिधि सभा विघटनको विरुद्धमा तेस्रो चरणको आन्दोलन घोषणा गरेको छ ।

शुक्रबार काठमाडौंमा पत्रकार सम्मेलन आयोजना गरी अखिलले प्रतिनिधि सभा विघटन विरुद्धमा तेस्रो चरणका संघर्षका कार्यक्रम सार्वजनिक गरेको हो । युनियनले सरकारको कदम नसच्चिँदासम्म आन्दोलनलाई निरन्तरता दिने र सम्पूर्ण विद्यार्थीलाई सहभागिता जनाउन अपिलसमेत गरेको छ । 

माघ १६ गते सहिद पार्कमा श्रद्धाञ्जली सभा गर्ने, माघ १८ र १९ गते स्थानीय तहको सरकारलाई ज्ञापनपत्र पेश गर्ने, माघ २९ गते सुरक्षा प्रमुख, संवैधानिक निकाय र कर्मचारी प्रशासनलाई प्रतिगामी सरकारलाई भद्र अवज्ञा गर्न सार्वजनिक अपिल गर्ने, मन्त्रीहरुलाई सार्वजनिक बहिस्कार गर्ने, मन्त्रीहरुका गाडी चल्न नदिने लगायतका विरोधका कार्यक्रम सार्वजनिक गरेको छ । 

यस्तै माघ २१ गते सबै क्याम्पस अगाडि कालो झण्डासहित ३० मिनेट चक्काजाम गर्ने, माघ २२ र २३ गते सरकारी नम्बर प्लेटका सवारी साधन निषेध गर्ने र युवामार्च गर्ने, माघ २५ गते प्रधानमन्त्री ओलीलाई विरोधपत्र बुझाउनेलगायत कार्यक्रम पनि सार्वजनिक गरेको छ । 

यस्तै, कोभिड विरुद्धको खोप शिक्षक, कर्मचारी र विद्यार्थीहरुलाई प्राथमिकतामा राखी शैक्षिक संस्था सुचारु गर्नुपर्ने लगायत माग पनि अखिलको छ । 

लिपुलेक, लिम्पयाधुरा सहितको नक्सा भएको पाठ्यपुस्तक सार्वजनिक गरी अध्ययन सुचारु गर्न दवावमूलक कार्यक्रम गर्ने, कोभिडका कारणले समस्यामा परेका विद्यार्थीलाई निःशुल्क अध्ययन गर्ने वातावरण मिलाउन दवाव दिने, अहिलेसम्मको शुल्क मिनाहा गर्न र लिएको शुल्क फिर्ता गर्न दबाव दिने, शुल्क नतिर्न विद्यार्थी र अभिभावकलाई आग्रह गर्ने लगायतका माग राखेर विरोध प्रदर्शन गर्ने समेत बताइएको छ ।