_{पछिल्लो केही दिन यता बैतडीमा भएको बलात्कार काण्डले सबैको ध्यान खिचेको छ । गत विहीबार बैतडीस्थित दोगडाकेदारको जङ्गलमा १७ वर्षीया किशोरी भागरथी भट्ट मृत अवस्थामा फेला परेकी थिइन् ।}

_{मृत अवस्थामा भेटिएकी उनको बलात्कारपछि हत्या भएको निष्कर्ष प्रहरीले निकालेको छ । उनको शव भेटिएको ६ दिनसम्म पनि प्रहरीले हत्यारालाई पत्ता लगाउन सकेको छैन् । प्रहरीले घटनाको अनुसन्धान गरिरहेको बताएको छ ।}

_{यो घटनालाई लिएर विभिन्न माध्यमबाट आवाज उठिरहेका छन् । विभिन्न र्‍याली तथा प्रदर्शन भइरहेका छन् । कलाकारले पनि भागरथीको न्याय माग्दै सामाजिक सञ्जाल मार्फत् आवाज उठाएका छन् ।}

_{अभिनेत्री करिश्मा मानन्धरले लेखेकी छन्, ‘बैतडीमा १७ वर्षीय किशोरीको बलात्कारपछि हत्या । नेपालका केही पुरुषहरूको मानसिकतामा यौन अपराध थुप्रिएको छ । त्यसैले बारम्बार यौन अपराध भइरहेका छन् । यो एक विकराल सामाजिक समस्या हो । यसलाई समयमा नै समाधान गर्नु जरुरी छ ।’}

_{उनले अगाडि लेखेकी छन्, ‘राजनीतिक दल, मानव अधिकारकर्मी, सामाजिक धार्मिक अभियन्ता, नागरिक समाज, कलाकार, समाजसेवीहरू सबैले मिलेर समाजमा सभ्य, अनुशासित, नैतिक र सद्भावपूर्ण वातावरण सिर्जना गर्नेतर्फ पाइला चाल्नुपर्‍यो । समाजलाई शिक्षित, नैतिक, अनुशासित, सभ्य र सद्भावपूर्ण बनाउनबाट हामी चुकिरहेका छौँ, कि ?’}

_{लेखक सुविन भट्टराईले प्रश्न गर्दै लेखेका छन्, ‘सहरमा गुलाब टिपेर मायालुलाई उपहार दिने मौसममा गाउँमा एउटी कोपिला निमोठिइन् । कसको भूल बढी ? अपराध गर्नेको कि अपराध क्षमा गरिरहनेको ? किन सधैँ यस्ता जघन्य अपराध छोपिन्छन् र अपराधी उम्किन्छन् ? किन सधैँ अपराधी सर्वेसर्वा र किन राज्य सधैँ निहत्था ? प्रश्नमात्र होइन जनता न्याय पनि मागिरहेका छन् । सधैँ खाली हात नपठाऊ ।’}

_{त्यसैगरी अभिनेत्री नीता ढुङ्गानाले बलात्कारीलाई चाँडै पक्राउ गर्न आग्रह गर्दै भनेकी छन्, ‘नारीकै कोखबाट जन्मिएर नारीकै हातबाट हुर्किएर नारीकै जवानीलाई रित्याएर तिनै पुरुष बलवान् बन्छन् तर पनि त्यही नारीलाई कमजोर र कम बुद्धि भएको लाचार किन सम्झन्छ ? सौन्दर्य शक्ति र शालीनताको अर्को रुप हो नारी । संसारको कुनै रुप सङ्ग पनि तुलना गर्न नसकिने एक विरासतको नाम हो नारी । नारीलाई अपमान होइन सम्मान गर्न सिकौँ । (सन्दर्भ : भागरथी भट्टको बलात्कारपछि हत्या प्रकरण ) हत्यारा बलात्कारीलाई चाँडै पक्राउ गरौं ।’}