नेपाल चिकित्सक संघले 'रेड अलर्ट' जारी गरेको छ । कोभिड १९ को संक्रमण बढ्दै गएपछि संघले नागरिकको स्वास्थ्य अवस्था गम्भीर अवस्थामा पुगेको निष्कर्षका साथ बुधबार देशभर रेड अलर्ट घोषणा गरेको हो । 

बढ्दो संक्रमितको संख्यालाई नेपालको स्वास्थ्य प्रणालीले थेग्नै नसक्ने अवस्थामा पुगेको भन्दै संघले सरकार, राजनीतिक दल, नागरिक समाज, बुद्धिजीवी र सर्वसाधरणलाई एकजुट भएर महामारीविरुद्ध लड्न अपिल पनि गरेको छ । 

संक्रमितहरु अस्पताल आउन नपाएको, आएकालाई अस्पतालले फर्काएको, बचाउन सक्ने अवस्था हुँदाहुँदै अक्सिजनको अभावमा बिरामीको ज्यान जाने गरेका लगायत हृदय विदारक दृश्यहरु देखिनु निकै पीडादायी भएको भन्दै संघले नागरिकको जीवन रक्षा भन्दा ठूलो अरु नभएको तर्फ सरकारको ध्यानाकर्षण गराएको छ । 

संघले कोभिडको पहिलो लहरमा नै आवश्यक स्वास्थ्य व्यवस्थाको तयारी नगर्ने हो भने भयावह अवस्था आउन सक्छ भनेर निरन्तर झक-झकाइरहे पनि सरकार, राजनीतिक दल लगायत सरोकारवालाहरु गम्भीर नबन्दा ठूलो संख्यामा नागरिकले ज्यान गुमाउनु परेको जनाएको छ । 

संघका महासचिव डा. बद्री रिजालले महामारी भयावह बन्दै गएकाले राजनीतिक जोड-घटाउलाई बन्द गरी सरकारसँगै सबै वर्ग र तप्काहरु महामारी विरुद्धको लडाईँमा एकजुट हुन आव्हान गरिएको बताए । उनले महामारीमा नागरिकको जीवन रक्षा गर्न संघले देशभर रेड अलर्ट जारी गरी सबैलाई कोभिडविरुद्धको लडाईँमा एकत्रित हुन अपिल गरे । 

संघले स्वास्थ्य क्षेत्रमा देखिएका अभाव तुरुन्तै सम्बोधन गर्न र उपचारमा आवश्यक पर्ने अक्सिजन, बेड लगायत अत्यावश्यक सामग्रीको उपलब्धता गराई नागरिकको जीवन रक्षा गर्न आग्रह गरेको पनि उनले बताए । 

महासचिव रिजालले भने, “नेपाल चिकित्सक संघले राजनीतिक दलहरु लगायत सम्पूर्णलाई एउटा अपिल गरेको छ । कोरोनाको दोश्रो लहरमा मानिसहरु संक्रमित हुने र मृत्यु हुने दर बढ्दै गइरहेको अवस्थामा बिरामीहरुले बेडको अभाव र अक्सिजनको अभावमा जीवन गुमाइरहेका छन् । यस्तो विषम परिस्थितिमा पनि देश र सरकारको ध्यान कोभिड महामारीभन्दा अन्यत्र गएको हुनाले सम्पूर्ण राजनीतिक दल, सरकार, बुद्धिजीवी, नागरिक समाजलाई अहिलेको विषय परिस्थितिमा कोरोनाविरुद्ध लड्न र चेन तोड्नका लागि संघले रेड अलर्ट जारी गरेको छ । जनताको जीवन खतरामा रहेको छ । त्यसैले संघले सम्पूर्ण उपायहरु अबलम्बन गरी नागरिकको जीवन रक्षा गर्न अपिल गर्दछ ।”

रिजालले विषम परिस्थितिमा आफ्नो ज्यान जोखिममा राखेर उपचारमा खटिएका चिकित्सकमाथि हातपात भएको र त्यस्ता घटनाले चिकित्सकको मनोबल उच्च रहन नसक्ने भएकाले चिकित्सकमाथि हुने हातपातका घटना रोक्न र संलग्नलाई कारबाही गर्न सरकारसँग माग गरे ।