कोपा अमेरिकामा ब्राजिलले लगातार तेस्रो जित दर्ता गरेको छ । ब्राजिलले बिहीबार बिहान निल्टन सान्तोष फुटबल मैदानमा कोलम्बिया माथि २-१ को कठिन जित हात पारेको हो ।

खेलको १० औं मिनेटमा लुइस डियाजले गोल गर्दै कोलम्बियालाई अग्रता दिलाए । उनले जुवान क्वाड्राडो क्रसलाई ओभर हेड किकमार्फत उत्कृष्ट गोल गरेका थिए । 

७८ औं मिनेटमा रोबर्टो फिर्मिनोले ब्राजिलका लागि बराबरी गोल गरे । उनले रिनान लोडीको क्रस बललाई हेडमार्फत् पोस्टको दिशा दिएका हुन् ।

थप गरिएको समयमा नेइमारको पासमा क्यासिमेरोले गोल गर्दै ब्राजिलको जित पक्का गरे । 

यो जितसँगै ३ खेलबाट ९ अंकका साथ समूह ‘बी’को शीर्ष स्थानमा रहेको ब्राजिलले एक खेल अगावै क्वाटरफाइनलमा स्थान सुरक्षित गरेको छ । ४ खेलबाट ४ अंक जोडेको कोलम्बिया समूहको दोस्रो स्थानमा छ ।