१.
जिन्दगी मिल्दै मिलेन उपचारबाट
म मान्छेजस्तै बनेको हुँ प्रहारबाट ।
ज्यान लाउँदैछौ दरबारसम्म पुग्न
सडकमा नि पुगिन्छ है दरबारबाट ।
तिमी केको खोजीमा यहाँसम्म आयौ
म भने हराएको हुँ यही बजारबाट ।
विचारले जित्न सकिनँ तिमीलाई
पक्कै जित्ने छु अब शृंगारबाट ।
सक्छौ भने त्यो जंघार तरेर आऊ
भो आँखा तरेर नहेर किनारबाट ।।
२.
भेडा अनेकौं छन् गोठाला अनेकौं छन्
जीवन हो जीवनका कथा अनेकौं छन् ।
हातमा सारंगी हुनेहरूको आँखामा हेर्नू
सपना अनेकौं छन् भाका अनेकौं छन् ।
दुश्मन पनि डराउनुपर्छ तिमी देखेर
उसो त ठाउँठाउँमा बुख्याँचा अनेकौं छन् ।
तिमी इमान सिक्नु र स्वाभिमान सिक्नु
क ख सिकाउने त पाठशाला अनेकौं छन् ।।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
