जनकपुरधाम उपमहानगरपालिकाले नगरक्षेत्रभित्र शैक्षिक सुधारको नाममा सामुदायिक विद्यालयहरूमा ३३ करोड ७० लाख ८९ हजार रुपैयाँ खर्च गरे पनि शिक्षाको अवस्था भने दयनीय बन्दै गइरहेको छ । शैक्षिक सुधारको नाममा करोडौं बजेट मात्र खर्च भइरहेको देखिन्छ । 

नगरभित्रका सामुदायिक विद्यालयहरूमा गुणस्तरीय शिक्षाको अभाव रहेको बेला जनकपुरधामस्थित युनिभर्सल एकेडमी कलेजले विद्यार्थीलाई निःशुल्क शिक्षा दिने घोषणा गरेको छ । 

धनुषाको लक्ष्मीनिया गाउँपालिका वडा नम्बर-१ सिनुरजोडा निवासी समेत रहेका युनिभर्सल एकेडेमी कलेजका सञ्चालक संजय यादवले आफ्नो गाउँपालिकाका सातवटै वडाबाट एक छात्र र एक छात्रा गरी प्रत्येक वर्ष दुई/दुई जना गरी जम्मा १४ जना अति विपन्न विद्यार्थीलाई छात्रवृत्तिमा पढाउने घोषणा गरेका छन् ।

 गाउँपालिकाको बाेर्ड बैठकमा सञ्चालक यादवले यस्तो घोषणा गरेका हुन् । 

प्रत्येक वडाका वडाध्यक्षहरूले आ-आफ्नो वडामा अति विपन्न, जेहेन्दार विद्यार्थी छनौट गरी सिफारिस गरेपछि उनीहरूलाई सो कलेजमा निःशूल्क शिक्षा प्रदान गरिनेछ ।

विपन्न तथा जेहेन्दार विद्यार्थीहरुको छनौट गरी सिफारिस गरिए अनुसार आफ्नो कलेजले छात्रवृत्ति प्रदान गर्ने सञ्चालक यादवले बताए । 

सामाजिक उत्तरदायित्व निर्वाह गर्नुका साथै शिक्षाको स्तर उकास्न युनिभर्सल एकेडेमी कलेजले यस्तो घोषणा गरेको उनकाे भनाइ छ ।