इटालियन सिरी ‘ए’ अन्तर्गत शनिबार भएको खेलमा युभेन्टस पराजित भएको छ । उसले घरेलु टोली नापोलीविरुद्धको खेल २–१ ले गुमायो ।

युभेन्टस सुरुवाती अग्रता जोगाउन नसक्दा स्तब्ध बन्यो । खेलको १० औं मिनेटमा अल्भारो मोराटाले गोल गर्दै पाहुना टोलीलाई अग्रता दिलाएका थिए ।

खेलको ५७ औँ मिनेटमा माटिओ पोलिटानोले गोल गर्दै घरेलु टोलीलाई खेलमा फर्काए । ८५ औं कालिदोउ कोलिबेलीले गोल गरेपछि नापोलीले रोमाञ्चक जित दर्ता गरेको हो । 

जितसँगै नापोली ३ खेलमा शतप्रतिशत जितका साथ ९ अंक जोडेर लिगको शीर्ष स्थानमा रहँदा युभेन्टस समान खेलबाट १ अंकका साथ १६ औं स्थानमा छ । 

लिग अन्तर्गत शनिबार नै भएका अन्य खेलमा भेनेजियाले इम्पोली तथा फियोरेन्टिनाले एट्लान्टामाथि समान २–१ को जित हात पारे ।